Vawiin hian Serchhip DC Conference Hall ah Serchhip District chhunga Centrally Sponsored Scheme hmanga sawrkarin hna a thawh hrang hrang te endikna leh thlir hona, District Level Vigilance and Monitoring Committee neih a ni a, Chairman Pu CL Ruala, MP Lok Sabha leh Co-Chairman Pu Ronald Sapa Tlau, MP Rajya Sabha te bakah 27- Tuikum bialtu MLA Er. Lalrinawma ten an telpui.

Vigilance and Monitoring Committee Chairman Pu CL Ruala chuan, Meeting hmasaa harsatna kan tawh a bik takin PMGSY sum harsatna chungchangah Central lama hruaitute a biak thu sawiin chungte chu ngaipawimawhin Central lam pawhin rang takin Fund an rawn release thu a sawi a, harsatna an neih dangte pawh a theih ang anga hmalak zel a nih tur thu a sawi a ni.

Vawiina Vigilance and Monitoring Meeting hi Pu Ronald Sapa Tlau chuan a kaihruai a. District Officer te chu hmasawnna hnathawh ataka khawihtute leh kalpuitute an nih thu inhre reng turin a chah a, an thahnem ngaihna avanga a thil tha tam tak ramin a neih belh theih thu hrilhin mahni zawn theuhvah theihtawp chhuah turin a ngen a ni. Serchhip District Vigilance and Monitoring ah tlawmngaipawl te an kal that thin avanga lawmthu sawiin inthlahrung hauh lova an vei zawng te sawi chhuak thin turin a ngen bawk.

District Vigilance and Monitoring Committee Member Secretary Dr. Lalrozama, IAS, Serchhip Bawrhsap ni bawk pawhin thu sawiin Officer kalkhawmte chu an hnathawh kal meka hotute ngaihdan leh duh dante uluk taka chhinchhiah tura hrilhin, mipuite thlan ram hruaitute duhdan leh ruahmanna chu officialte chuan tha taka thawk mai thin tur kan ni tih inhre reng turin a ngen a ni.

Report atanga a lan danin Serchhip District chhungah hian PMGSY atangin kawng km 148.46 a thui laih mek ani a, hengte hi 2016 - 17 chhunga zawh hman tura ruahman niin hna dang thawh leh mai tur ruahman pawh a awm mek ani. Mahatma Gandhi Rural Employment Guarantee Act hnuaia kum 2015-16 chhungin ni 75 inhlawhna siam hman a ni a, chumi atan chuan Rs nuaih 1886.59 sen niin tha (persondays) 1030927 thawh a ni a, Job Card nei mi 14159 a awm bawk. Tun kum kal laiah hian ni za inhlawhna tur sum hmuh a la nilova, hmuh a nih hunah heng Anganwadi Centre sakte, Ekin neilote ekin sak sak te, Changpat leitha siam te, Sangha dil laih te, PMGSY kawng kama thing phunte leh huan chawmtu dil laih lamah te a bika hmalak a ni ang. Integrated Watershed Management Programme ah kum 2015-16 chhungin Fund cheng nuai 607.062 hmuh niin Project pasarih hnuaia hna hrang hrang thawh a ni a, ram Hectares 925.58 a zauvah hma la tawhin cheng nuai 523.174 sen ral tawh a ni a. Serchhip District IWMP Project Cost atana ruahman zat hi cheng nuaih 4897.50 zet a ni thung.

BADP ah kum 2015-16 chhungin cheng nuaih 205 ruahman a ni a, Infrastructure sector lama hnathawhte chu thawh zawh vek tawh niin Social sector atanga hnathawh heng; Mualcheng, Lungkawlh leh Sailulakah te Community Hall sak mek an ni a, N. Vanlaiphaia YMA Library sak mek pawh zawh fel tep tawh a ni bawk. Chekkawn khuaa Community Hall sak mek erawh chu a hmun a min vek avangin a hmun thar turte ngaihtuaha hma thar lak leh tura ruahman a ni. Skill Development lamah khaw 9 ah Cement Mistiri training neih a ni a, Tailoring leh Carpentry lam pawh tun hnaiah training buatsaih tum a ni bawk.

Mirethei in sakna Indira Awas Yojana ah kum 2015-16 chhungin in 34 sak zawh hman a ni bawk a ni.

Hengte bakah hian Central sum hmanga sawrkar hnathawh hrang hrang, Swachh Bharat Missions te, National Rural Livelihood Missions te, Pre-Matric Scholarship te, National Social Assistance Programme te, Rajiv Gandhi Grameen Vidhyotikaran Yojana te, National Rural Drinking Water Programme te pawh sawi ho a ni.

He meeting ah hian District Vigilance and Monitoring Committee Member Secretary Dr. Lalrozama, IAS Serchhip Bawrhsap ni bawk leh Pi Teresy Vanlalhruaii, PD, DRDA Serchhip bakah District Officer engemawzat an tel a ni.