Champhai District Green Mizoram Committee in 11th June 2014 chu Champhai District huam atana Green Mizoram Day 2014 a alo puan tawh angin tukin zing dar 10:00 khan Green Mizoram Day 2014 Planting ceremony chu Champhai CHANEM tual-ah hman ani a, he hun hi Pu Zoengsanga, Addl.DC Champhai District chuan khuallian niin a hmanpui.

Planting ceremony Pu Vanlalchuailova, DFO& Member Secretary Champhai District Green Mizoram Committe kaihhruai ah hian Khuallian Pu Zoengsanga chuan thingphun tura kalkhawmte chibai bukin kum engemaw zat Green Mizoram Day chu hman a lo ni tawh a, kan hman tan atanga kan thingphun tawh zawng zawng te kha han ngaihtuah chuan tunah hian thingkung tam tak nei tawh awm kan ni a, amaherawh chu kan thingphun tawhte kha kan ngaihsak tawk lo a ni mai thei , kan phun tam tawh ngaihtuahin a tak hmuh tur a vang hle a ni tiin Pathian in kan ram leilung hausakna min pek thing leh mau, Ramsa te kan ti chereu in nasa takin kan ti bua zo ta vek a, zin veivak tan pawh zinkawng te a a nuam tawh lo ani ati a. Khuallian chuan Champhai a lo awm tirh vawt a tih thin chu a lo lum ta hle a ni tiin, chu chu engvangnge tih chuan boruak tha min siamsaktu thing leh mau te kan ti chereu nasa ta ani tiin Champhai boruak tinuam leh tur chuan tan lak a ngaih hle thu a sawi a. Forest department ten kan ramin kan mamawh ram nuam tak leh tui, a tel lova kan awm theih loh kan neih theih nan nasa takin ramngaw siam hna an thawk a, kan theihtawpin keini pawhin kan pui tur a ni a ti.

Hemi hnu hian Champhai khawchhung leh a chhehvel hmun hrang hrang a thingphun tura department, tlawmngai pawl leh zirlai kalkhawmte chu khuallian hian a vai liamin Green Mizoram Day a thingphun mai chu duhtawk lovin an thingphun theuhte enkawl zui zel turin a chah nghal ani.

Vawiin Green Mizoram Day Planting ceremony ah hian Champhai District chhunga ram ti kang lo khua lawmman late puan an ni a, khaw tamtak ram ti kang miah lo an awm a, chung zinga khaw 3 chinte chu Mizoram sawrkar in lawmman sum faia pek tur a tih ang ram ti kang lo khaw tam tak zingah a vannei zual khaw thum 1st - Lungtan ( Rs.50,000/-), 2nd- Hliappui (Rs.30,000/-) 3rd- Tualpui (Rs.20,000/-) te hnenah pek an ni.