Vawiin chawhma dar 10 : 30 khan Circuit House Saiha-ah Environment & Forest Department, M.A.D.C. bul tumin “Set up to green Saiha Town” tih thupui hmanga neih “Green Mizoram Day, 2014” chu hlawhtling taka hman a ni.

He Ni hmanna hi Pu Solai Azyu, ACF, M.A.D.C. chuan kaihruaiin Pu Alok Swarup IAS District Bawrhsap chu khuallian ani. Thu sawiin khuallian chuan Green Mizoram Day hi vawi tam tak hman thin tawh a ni ati a, Thingtiak hi tam tak phun mah ila a enkawl zui lamah tan kan lak a ngai a ni tiin tlawmngai pawl hrang hrang te leh mipuite chu thingtiak phun nun sa enkawl kawngah tan la lehzual turin a chah a, Thing kan kih dawn reng reng in thuneitute hnen atanga phalna kan lak hmasak a ngaih thu a sawi bawk. Thang lo thar zel te tan a luah tlak ram tha siam turin Thing phun uar theuh turin kalkhawm te chu a chah bawk. Tuna Thing kan phun hian nakin a kan ram ti nuam a siam tha tu tur a ni ati bawk.

He Ni hmanna ah hian Saiha District chhung a Village Council mahni ram huam chhung kangmei laka vawnghim tha te hnenah lawmman sem ani a, Saiha District chhung Village Council hrang hrang atanga lawmman dawngtute chu 1-na Chapui Village Council, Rs 50,000/- 2-na Mawhre Village Council, Rs 30,000/- leh 3-na Chheihlu Village Council Rs 20,000/- te niin heng lawmman te hi Pu K.H. Beihlo, E.M. i/c Forest etc M.A.D.C. chuan a sem a ni.Pu K.H.Beihlo chuan thu sawiin mi duham leh pamham engmah ngaihtuah lo te avanga lunghnur leh beidawng mai lo turin kalkhawm te chu a sawm a, beidawng lova theihtawp chhuah a Thingphun lamah nasa lehzual a tan la turin kalkhawm te chu a chah a, sawrkar department hrang hrang te chu an Thing phun te uluk leh fimkhur taka enkawl zui turin a chah bawk. He Ni hmanna ah hian MADC Forest Department chuan Saiha khawpui chhunga phun turin Department hrang hrang te hnen ah Thing tiak chi hrang hrang 1000 chuang a sem zui nghal a ni.