Champhai District Tobacco Control Cell buatsaihin vawiin khan District Hospital-ah Health Care Provider-te tan vaihhlo chungchangah training neih a ni a.

He hun hi Dr. R.Lianmawia, SMO chuan kaihhruaiin, mipui vantlang tana hriselna lama hnathawktu ASHA leh Healh Worker-te chu an hnathawhna hmun leh vahchhuah naah te vaihhlo that lohzia pu darhtu leh mite zirtirtu ni zel turin a sawm a. Hriselna lama hnathawk kan nih angin mipui entawn tlakin keini pawh kan nun uluk a ngai a, vaihloa kan fihlim lo a nih chuan a that lohzia kan hrilh mipuite chuan a that lohna hi a hmu thei dawn chuang lo a ni, a ti.

Vawiin training-ah hian Pi C.Lalremruati, Psychologist chuan vaihloin hriselna a tihchhiat theih dan leh, nghei tura hmalak dan tur te, District Tobacco Control Cell-in vaihlo nghei duhte tana hma a lak thei dan tlangpuite a tarlang a. District Consultant Pi Vanlalmuanawmi chuan vaihlo khuahkhirhna dan, COTPA chungchangah zirtirna pe in, District Mental Health Clinic atangin Mental Health Awareness neih a ni bawk.

Vawiin chawhnu khan Champhai District Anti-Tobacco Squad-te chuan Champhai khawpui chhungah Squad Drive an nei chhunzawm nghal a. Pictorial Warning awm lohna meizial zuar leh puipunna hmuna meizu te vaiin, meizual zuar mi 10 chuang hnen atangin pictorial warning chuang lo cigarette brand hrang hrang carton 482 (cheng nuai 1 leh sing 5 chuang man hu) an man a. Puipunna a meizu erawh man an nei lo thung.