Vawiin hian Pu John Rotluangliana, Tourism Minister hovin a Office Chamber-ah Ni.1 - 3, October, 2015 chhunga Mini Sports Complex, Lengpui-a Anthurium Festival neih tur chungchanga inbuatsaihna thlirho a ni.

He hunah hian Pu Vabeiha Hlychho, Director, Tourism Department, Member Secretary ni bawk chuan a hun taka tan anih theih tawh thu tarlangin Department hrang hranga mawhphurtute pawhin an chanvo an tihhlawhtlin zel thu report a pe a ni.Meeting chuan Detail Programme lo duan lawkte thlir hovin a pawm a, Festival neih chhunga chanvo leh mawhphurhna hrang hrang neite’n tha zawka an hlen chhuah theih nan siam rem ngaite inhrilh hriatna neih a ni.

Meeting-ah hian Pu John Rotluangliana, Tourism Minister chuan he Festival hi Central Sorkar in buatsaih tura min beisei angin an sum min pek atanga buatsaih anih thu leh hei hian inpumkhatna tha zawk, Zoram chhunga hnam hrang hrangte inkarah a thlen ngei a beisei thu a sawi a. Hnam zia (Culture) vawnhim zelna kawnga thangtharte kawng kawhhmuhtu anih ngei a beisei thu a sawi bawk a ni.

He Anthurium Festival hlawhtlinna tura mawhphurtu zawng zawngte leh Department hrang hrangte inpekna-ah lawmthu sawiin, he hun hi hlim taka hmang theuh turin Zoram mipui zawng zawng a sawm bawk a ni.

Anthurium Festival, 2015, Ni.1-3, October, 2015 hman turah hian 1st October,2015-ah Mizoram Governor, Lt. General (Retd) Nirbhay Sharma chu khuallian a ni ang a, 2nd October, 2015 ni-ah Pu T.T Zothansanga, Parliamentary Secretary chu khuallian niin a tawpni 3rd October, 2015-ah Pu John Rotluangliana, Minister, Tourism Department chu khuallian a ni ang.

He Meeting-ah hian Pu T.T Zothansanga, MLA, Parliamentary Secretary, Tourism, Pu V.Lalremthanga, IAS, Secretary, Tourism leh State Level Organising Committee Members te an tel a ni.