India ram Independence Day vawi 65-na chu Champhai Chhangphut field ah tukin zing dar 10:00 khan tluang taka hman a ni a, Pu Lalrinliana Sailo, Minister, Health & Family Welfare chu khuallian niin Hnam Puanzar a pawt pharh a, Independence Day thuchah a sawi nghal a ni.
Pu Lalrinliana Sailo chuan Zalenna Ni lawmawm tak neih theihna tura sulsutu leh hruaitu hmasa te hriatreng an niin zahna kan hlan a ni tiin India ram chuan kum reilote chhungin Science & Technology, Information Technology leh Nuclear Technology lamah khawvel ram dangte hriat khawpin hma a sawn a, Economy lamah pawh ram dangte an tluk chhiat mek laiin hma lam panin India ram ropui tak hi a kal mek zel a ni a ti a. Vawiin ah hian ram hmasawnna tura thapui thawh thei turin Mizoram sorkar chuan nasa takin hma a la mek a, a bik takin miretheite leh rahbi tleute chawikan nan NLUP chu chak taka kalpui a ni a, Planning Commission pawhin hei hi a ngai pawimawh a, NLUP atan sum senso tura ruahman kum 2011-2012 ah Rs. 234 crores a nih laiin kumin 2012-2013 atan chuan Rs. 370 crores zet min ruahman sak nghe nghe a ni a ti a.
Thalaite hamthatna tur leh an tunhnu hun tur ngun taka ngaihtuah a tul a, chumi atan chuan sports lamah tuaihriam an nih theihna turin hmun hrang hrang ah sports infrastructure playground leh stadium te a theih ang anga buatsaih mek zel a ni tiin Khuallian chuan hriselna lam sorkarin a ngaih pawimawh thu sawiin Referral Hospital Falkawn a taka hman theih a peihfel tur hian DoNER ah Rs. 18.52 crores dil mek a ni a, Champhai District Hospital sak mek pawh kumin 2012 chhung ngeia hawn tum a ni a ti a, Helicopter Service pawh tan a lo ni ta hi a lawmawm thu sawiin hei hi a bik takin damlo, hmanhmawh thlak taka hmunpui pan ngaite tan a tangkai hle dawn a ni a ti.
Khuallian chuan hriselna lamah nasa taka hma kan lakna avangin Health Department chuan heng chawimawina te hi tunhnaiah a dawng tawh a ni a ti a, chungte chu :1) 2nd Best NRHM Performing State ; 2) India Today Most Improved State in Health ; 3) Outstanding Improvement ; 4) JRD Tata Memorial Award for Population, Reproductive Health & Family Planning Programme te an ni.
Border Trade hi sorkar in a ngaih pawimawh hle thu sawiin Minister chuan Zokhawthar ah Land Custom Station (LCS) a din tawh a. Kum 2009 hnu lamah Rs. 7 crores lai sengin Zokhawthar leh Melbuk ah Border Trade atana inbuatsaihna hna hrang hrang thawh a ni a, LCS Zokhawthar hmun hi Adviser to Prime Minister in a rawn tlawh tawh a, hawn (commission) mai theiha peih fel vek tawh a ni tiin Border Trade (Mizoram Sector)tih hmasawnna leh tihchangtlunna atan hian Central sorkar chuan kumtin ASIDE scheme hnuaiah Ministry of Commerce atangin pawisa hetiang hian a rawn pe thin a ni : 2009 - 2010 - Rs. 792 lakhs, 2010-2011 - Rs. 175 lakhs, 2011-2012 - Rs. 178 lakhs, a vaiin - Rs. 1145 lakhs a ni a ti.
Kumin Independence Day Chhangphut Field, Champhai a hman na ah hian Contingent 28 ten March Past entirin SI R.L.H. Dingzela, Parade Commander in a kaihruai a ni. Independence Day pual hian infiamna chi hrang hrang - Football, Basket Ball, Volley ball, Table Tennis, Badminton leh Chesss ah te inelna neih a ni bawk.
Chhangphut Field a Independence Day Programme hman zawh hian Jericho Garden Keifangtlang ah Independence Day ‘AT HOME’ Minister ho hian hman zui nghal a ni.
