Education Minister Pu Lalsawta chuan, ‘Zirna hmanga State changkang leh chhungkaw changtlunna thlentu ni turin kan ban phak renga awm thiamna hi i ban hram hram ang u,’ a ti.

Kolasib Tumpui field-a India Independence Day lawmnaah hnam puanzar a pawhpharh hnua thuchah sawiin he thu hi Pu Lalsawta chuan a sawi a. Mizo fate hi khawvel ram ramdanga mite aiin kan hniam bik hauh lova. Boruak ralmuang tak hnuaia hmasawnna kawnga ke kan pen thei hi a ropui a, amaherawhchu duh tawk mai lovin ke pen zel ila. Engmah thawh hreh nei lo, engpawh zir thar inhuam reng thalai kan ngah tial tial ang tih ka beisei tlat a ni, Pu Sawta chuan a ti a. Heng kan thalaite hi kan hnam ro hlu an nih avangin anmahni kan enkawl danah i fimkhur hle ang u, a ti a ni.

Minister chuan India ram Danpui huap zau tak hnuaiah Mizoram mipui ten kawng tinrengin hma kan sawn a. State changkang leh upa zawk tamtak karah ziak leh chhiar thiam tam ber pahnihna kan nipha a. Department hrang hrang hmasawnna pawh sawi tur tam tak a awm a. Chung zinga sawi loh theih loh chu mi rethei tlusawp tawhte chhanchhuahna tura NLUP buatsaih a nite leh Infiamna lama kan thalaite hmasawnna nasa takte hi an ni, a ti a. Mahni mamawh phuhruk piah lama hralh chhuah tham Power nei tura Mizoram sawrkar hmalakna hi a hlawhtlin hun a nghahhlelhawm hle a ni, a ti bawk a ni.

Kolasib-a I- Day lawmnaah hian Ceremonial Parade/ March Past hmuhnawm tak entir a ni a. Contingent 17 hetah hian an tel a.Heng zinga lawmman dawngtute chu Uniformed contingent-ah I-na Ist IR Bn, II-na NCC Girls leh III-na NCC Boys, St. Johns HSS te an ni a. School Contingent zingah I-na Hmar Veng HS, II-na CZ HSS leh III-na JNV Thingdawl te an ni.

Khuallian Pu Lalsawta hian naupang huaisen Lalmawizuali (9), Bukpui khua chu an In kang nasa tak kara a nau muhil kum 3 mi a chhanchhuah avangin Huaisen lawmman Jeevan Raksha Padak a hlan a ni. Kolasib-a Independence day lawmna pual hian thlalatu inzawmkhawm pawl Zoom Kolasib chuan Photo Exhibition an buatsaih chu Khuallian Pu Lalsawta hian Ceremonial Parade zawhah a tlawh a. Category pahnih, DSLR (Envi & Forest) leh Compact ahte then a ni a, heta lawman late hnenah hian Minister chuan lawman a sem a ni. Exhibition hi mipuiin an hlut hle hle a ni.Sports category hrang hranga tithate hnenah Pu Lalsawta chuan lawman a sem nghal bawk a ni.

Education Minister hian parade neihna hmun field diak taka lam school naupangte chu an tihthat avang leh an chawlh hahdam nan Aug 16th skul chawlh a pe a ni.

Chawhnu lamah VIP at Home, Circuit House-ah neih a ni.