India British sawrkar awpna hnuai atanga a indanna champha “Independence Day “ vawi 66-na chu vawiin chawhma dar 10 : 30 khan District Playground Saiha-ah ropui leh urhsun taka lawm ani.

He Ni lawmna inkhawm ah hian Pu S.Hiato, Minister i/c P.H.E etc chuan khuallian niin Parade Contingents 17 ten hnampuanzar chibai an buk a chhang let a, Independence Day thuchah sawi nghalin mipuite chu India ramin zalenna a hmuh theih na tura theih tawp chhuaha hna lo thawktu kan hruaitu hmasa te hrereng turin a chah a. Ram ralmuanna venhim kawngah pawh hma nasa taka lak an tum thu sawiin khawtlangnun ralmuanna leh ngelnghehna atan theih tawp chhuah a thawk zui zel turin mipuite chu a sawm ani.Kut hnathawktu leh mirethei zawkte inkhaichhuah theihna tura sawrkarin scheme hrang hrang leh ruahmanna hrang hrang a siamte tarlangin sawrkarin a hmachhawp hrang hrang te pawh a tarlang bawk ani. NLUP hlawhtlin theih na tura sawrkar hmalakna chu Central sawrkar pawh in a phurpui thu sawiin tun dinhmunah NLUP Ist Phase atan chhungkua 45139 thlang chhuakin an sum dawn turte pawh pek anih tawh thu a sawi a 2nd Phase atan chhungkua 45000 thlanchhuah an nih tawh thu a sawi bawk. NLUP atan hian kum 2010-2011 ah cheng nuai 23400 dah ani a, kum 2011-2012 ah cheng nuai 23400 bawk dah leh niin kumin 2012-2013 hian cheng nuai 37000 bakah RKVY atancheng nuai 4000 dah belh anih thu a sawi bawk. Saiha District chhungah First phase ah ringawt pawh chhungkua 2269 hnenah NLUP pek ani a, Second phase ah chhungkua 2300 hnenah NLUP sem anih thu a sawi bawk. Sawrkar chuan inkalpawhna tha a ngaih pawimawh thu sawiin thalaite hmakhua thlir chunga an talent te haichhuak turin sawrkar chuan theihtawp achhuah mek ani, ati bawk. Greater Saiha Water Supply Scheme pawh chak tak a hma lak mek anih thu sawiin tunah hian pawisa leh engkim peihfel anih tawh thu a sawi bawk.

Independence Day lawmna Parade ah hian Contingents 17 awmin Uniform leh School Contingents a then hran an ni a, heng parade contingents te hi Sub-Inspector HC Vakhu 2nd Bn MAP chuan a kaihruai ani. Uniform Contingents-ah Pakhatna Bharat Scout & Guide an ni, pahnihna chu NCC/G.H.S.S. te niin pathumna chu Mizoram Home Guard, Saiha te an ni. School Contingents ah pakhatna Don Bosco School te an ni a,pahnihna chu Foxoll School te niin pathumna chu Hill Gate School te an ni a, Parade Contingents zawng zawngte hnenah Consolation Prize pek vek anni.

Independence Day lawmna pual hian sawmbikte tan Thingpui in hona “AT HOME” CEM,MADC Bungalow ah chawhnu dar 1 : 00 ah neih ani a, sawmbikte an kal tha hle ani. chawhnu dar 1 : 30 ah Independence Day Foot Ball Final chu Model Youth Club te leh New-colony Football Club ten an khel a, Independeence Day Volley Ball final pawh BS Club, New Saiha te leh PCCV ten an khel bawk. He Ni lawmna pualhian District Jail, Damdawiin leh Hnuchham In ah te thilpek hlan ani a, Saiha District chhunga Sub-Division Tuipang-ah pawh zing dar 10 : 30 khan Tuipang Playground ah he Ni lawmna hi Pu R. Lalrinawma, Chairman Law Commission hovin neih a ni bawk.