Vawiin chawhma dar khan India Zalenna champha vawi 65-na chu India ram hmun dang ang bawkin Lunglei khawpui pawhin Thuamluaia mual ah urhsun takin a hmang ve. He hun ah hian Home Minister Pu R. Lalzirliana chu Khuallian niin Pu V.sapchhunga, Lunglei Bawrhsap chu Khual zahawma ah hman a ni a.Khuallian hian hnam puanzar pawt parh in parade contingent 20 hnam puanzar zahna chibai buk a lo chhang let a ni.

Pu R. Lalzirliana chuan kal te hnenah India ram zalenna champha vawi 65-na chu ni ropui India khua leh tui zawng zawng tana chhinchhiah tlak a nih thu a sawi a. He hun hlu tak ah hian India hnam Pa Mahatma Gandhi, ram tana martar te leh zalenna sualtute inpekna leh hnathawh ropui tak tak te chu hre reng in India ram hmasawn nan mitin te ke pen zel tura in hlan tharna ni ah kan ngai a ni a ti a.

Kum liamta a Mizoram state sawrkar hmalakna hrang hrang sawiin chung zinga lian ber NLUP a hmalakna kal pui mek leh hmasawnna te a tarlang a. Mizoram mipui tam zawk te leirem rah leh theih na tur leh sawrkar hmalak mek huapzo ber si New Land Use Policy (NLUP) chu chak taka kalpui a ni a; Planning Commission pawhin a ngaihven em em, kum 2011-2012 chhunga senso atana cheng vaibelchhe 234 a pawm sak tawh chu kum 2012-2013 ah ti pung leh in cheng vaibelchhe 370 zet a ruahman sak leh a ni a ti.

He hmalakna avang hian 11th Plan hun tawp kan chuankai meuh kha chuan, tlangram lo neihna atana ram kan hman thin pawh za zela 42 laiin a tlahniam hman a, NLUP leh Rural Development Department hnuaia MGNREGS te, ICT Department hnuaia SWAN Project-te awmze nei taka suihfin avangin district tin leh thingtlang khaw tam takah Rajiv Gandhi Seva Kendra building-te sak a ni a; chung te chu NLUP project enkawl leh vil zuina atan remchang taka hman theih a ni dawn a ni tih Pu Lalzirliana chuan a sawi a.

Khuallian chuan, “Hmasawnna rah hi mi retheite leh mi hnuaihnung zawkten a zar an zawh ngei theihna turin theih tawp kan chhuah tak meuh a. Vawiinah hian, sawrkarin a hmachhawpte a tihpuitlin theihna tura theih tawpa tan min lakpui thin avangin sawrkar kutke zawng zawngte hnenah te, tlawmngai pawlte leh NGO chi hrang hrang chungahte lawmthu ka sawi duh a. In tanpuina leh tawiawmna tel lo chuan sawrkar hian a ruahmannate hi a tipuilting thei lo tih ka hria a ni” a ti a. Mizoram a cheng te inngeih dial dial chen ho zel a pawimawh thu sawiin he state hi kawng tinrenga hma a sawn a, India ram state dangte tana entawntlak a nih hial theihna tura thawk turin mitin terilru kan siamthar leh theuh a ngai a ni a ti.

Kumin Independence day parade ah hian armed ah 2nd batallion MAP pakhatna, unarmed ah Guide company, Mount Hermon pakhatna leh school contingents ah Adventist English school, bazaar veng te chu pakhatna an ni hlawm a. 2nd Battalion MAP pipe band leh 40th Assam Riffles pipe band ten inchawih mawi takin rimawi an tum bawk a ni.

Independence day ah hian kum dang ang bawk in Football, karate leh Volley Ball ah te tournament buatsaih leh a ni a, result erawh Karate competition chiah in a nei hman thung. Karate Tournament ah hian SSA Lunglei south Karate academy chu champion in Best Fighter ah Samson Lalnghilhlova leh B. Lalrinfeli te chu thlan an ni.

Pu K.Lawmsanga, Zote Khua chu Savawm kawlh lakah nunna a chhanhim avangin huaisenna lawman sang Jeevan Raksha Padak Sawrkar laipui aiawh in Home Minister Pu R. Lalzirliana’n a hlan a. Official programme zawh hian Dc’s Conference hall ah DC’s at Home function hman chhunzawm a ni.