Tukin zing dar 10 khan CYLA Field, Lawngtlaiah India Independence Day vawi 66-na chu ropui takin lawm a ni a. Food Civil Supplies and Consumer Affairs leh Environment &Forests changtu Minister Pu H.Rohluna’n hnam puanzar pawtpharhin parade contingent 25 te chibai buk a chhanglet a ni.

 Minister Pu H. Rohluna chuan ram zalenna atana hruaitu te, nunna hlantu te leh thawktu te zawng zawng zahna chibai a buk a, he ni hmang tura kalkhawm zawng zawng te chungah lawmthu a sawi. Mizoram sorkar in hmasawnna hna a thawh dan hrang hrang te sawiin Minister chuan sorkar hmalakna pui ber New Land Use Policy (NLUP) tha taka kalpui zel a nih thu leh 2012-2013 atana sum mamawh pawh Planning Commission-in cheng vaibelchhe 370 lai a ruahman sak tawh thu te, chhungkaw 45,139 in first phase-ah tanpuina dawng tawhin 2nd phase-ah chhungkaw 45,000 tan tanpuina sem thuai tum a nih thu te leh kumin sorkar kum tawpah chhungkaw 1,20,000 tuam hman a nih tur thu te a tarlang.

Public Distribution System kaltlangin sum harsatna karah pawh mipuite’n buhfai tlawm zawka an lei theih nan cheng vaibelchhe tam tak sorkar chuan a chawisak (subsidize) thin tih sawiin Supply changtu Minister chuan LPG hnianghnar zawka mipuiten an hmuh theih nan tan lak reng a ni a, RGGLV hnuaiah Gas Agency khaw 6-ah hawn tawh niin khaw 7 dangah hawn leh thuai tum a ni, a ti. Lawngtlai a petrol pump dah belh turin hmalak mek a nih thu a sawilang bawk.

Environment and Forests changtu nibawk Pu H. Rohluna chuan ramngaw humhalh leh siam belh tura hmalak a nih thu sawiin National Afforestation Programme leh a dangte kalpui a nih dan bakah, nauban dahkhawmna Orchidarium leh Medicinal Plant Garden Sairangah hawn a nih thu leh State Forest Training School changtlung zawk siam tura hmalak mek a nih thu a tarlang bawk. Mipui hriselna enkawlna lam (Health Care) ngaipawimawhin sorkar chuan 2011-2012 chhung khan sorkar hnathawk lo damlo te inenkawlna tur cheng 4,24,04,735 hman a nih thu leh khaw 122 hnenah tui pek a nih thu te, 2012-2013 chhungin khaw 57 ah tui pek tum a nih thu a sawi a. Khaw hrang hrang Hospital te tihchangtlun zel niin Lawngtlai leh Saiha Hospital te tan pawh DoNER Ministry-ah sum dil mek a ni, Pu H Rohluna chuan a ti bawk.

Minister chuan loneituten buh leh thlai hlawk zawka an thar chhuah theih nan Integrated Scheme of Oil seeds, Pulses, Oil palm and Maize (ISOPOM) leh System of Rice Intensification (SRI) kalpui zel a nih thu te, thingtlang lam hmasawnna ngai pawimawha ni za inhlawhna (MGNREGS), insak tanpuina (IAY) kalpui zel a nih thu te, BADP leh BRGF kaltlanga hna tam tak thawh a nih tawh thu a tarlang a. Kawlphetha mamawhna hriain Tuirial HEP chak taka kalpui mek a nih bakah Tuivai HEP, Kolodyne HEP, Lungreng HEP, Chhimtuipui HEP leh a dang te hmachhawp mek a ni, a ti bawk. Mizoram chhunga National Highway te siamthat mek a nih thu pawh tarlangin Hrangchalkawn leh Lawngtlai inkar Contractor-in hna a thawh hleih theihloh vanga a hna cancel a nih thu leh kawng siamthat nan 2012-2013 chhungin cheng vaibelchhe 85 dah a nih thu a sawi a. Kaladan Multi Modal Transport Project hnuaiah Lawngtlai leh Myanmar ramri inkar kawngpui double lane, 100 kms chu thawh mek niin hei hian Mizoram kaltlanga India hmarchhak bial tan ramdang nena insumdawn tawnna kawng a hawng dawn a ni, Minister Pu H Rohluna chuan a ti bawk.

Thalaite mamawh hriain sorkar chuan Sports lama talent nei te haichhuah na turin Catch Them Young Policy a kalpui a, Aizawl Lammual, Rajiv Gandhi Stadium leh Lunglei a Thuamluaia Mualah Artificial Turf phah niin Thenzawl leh Kawnpui Hockey Playground ah Astro Turf phah a ni, a ti a. Zirna siam tha tura sorkarin tan a lakna kawngah SSA kaltlanga zirlai tam tak hnena a thlawna zirlaibu sem a nih thu leh RMSA hnuaiah Secondary School 154 zet thawm that a nih thu te, Lawngtlai leh Mamit District-ah residential school cheng nuai 147.64 senga sak a nih tawh thu te a sawi bawk. Ram hmasawnna hna thawk tura remna leh muanna venhim a pawimawh tih hriain Mizoram Police ten rang taka pawikhawihtute an chhui a, an chinfel theihnan Crime and Criminal Network System siam mek a ni a. Remna leh muanna vawnhim te, khua leh tuite sahimna ngaihtuah te chu sorkar ngaihpawimawh ber te zing a mi a ni, Minister Pu H Rohluna chuan a ti. Autonomous District Council pathumte hmasawnna turin theihtawpin sorkar chuan tan a la a, an area huamchhunga hman tur sum pawh theih anga tam a ruahman sak thin a ni, a ti bawk.

SSA Pipe Band, Lawngtlai ten Band Display entirin parade an kaihruai a. Parade Contingent zingah Don Bosco Scouts Contigent chu pakhatna niin Govt. Region HSS Boys Contigent-te pahnihna an ni a, pathumna chu Jehova-Jireh English School Girls Contingent te an ni. Independence Day puala Football Tournament buatsaihah College Veng Football Club champion in Badminton Tournament Men’s Singles-ah N Lalramriliana a champion a ni.

Independence Day pual hian Lawngtlai khaw chhunga Hospital leh Lairam Motherless Home te tanpuina pek an ni a; tanpuina pe hian Lawngtlai Women’s Association Gen. Hqrs hotute an kal a ni.