Pu Lal Thanzara Parliamentary Secretary chuan vawiin khan Kawnpui Playground No II ah Independence Day hmangin hnam puanzar a pawtpharh.

School Contingent 12 leh NCC Contigent 2 leh 1st IR Bn Band Party ten Ceremonial parade ah hian March past an entir a,hnam Puanzar chibai chu chuallian hian a lo chhang let a ni.

Pu Lal Thanzara chuan mipui hnena thuchah sawiin India ram chu khawvela sum leh pai lama chunung berte zingah chhal ngam hial a nih tawh avangin chumi a ram pengkhat kan ni chu a ropui hle a ni, a ti a. Mizoram sawrkar chuan hmasawnna hna a ngai pawimawh a. Mipuite tana kan intiam ang ngeiin New Land Use Policy chu Sorkar Flagship Programme niin chak taka kalpui chhoh mek a ni a, Planning Commission pawhin tha a tih avangin fund allocation kum 2011-2012 a Rs. 234 Crore chu kum 2012-2013 atan Rs. 370 crore ah a tipung chho ta a ni, a ti a ni.

Kawnpui Sub Division huamchhunga hmasawnna tarlangin : 1) Kawnpui - Hortoki kawng hi nikum chhung khan sum kan neih loh avangin a chhe zualpui thawm nan Rs. 25 lakh hmanral a ni a, kuminah chuan Central Special Plan Assistance hnuai atangin helai kawng hi siam that vek nan Rs. 3.5 crore dah a ni. Kawnpui khawchhung chei nan hian kum danga pawisa dah thin aia tam dah a ni dawn bawk. 2) Serkhan leh Bagha inkar kawng sialna (Intermediate Lane) Rs. 146 crore senna tur chu thawh mek a ni. 3) Zanlawn - Mualkhang kawng pavement hnathawh tur pawh PMGSY atanga ruahmanna siam a niin DPR thehluh a ni tawh. Kumin chhung ngei a sanction hmuh beisei a ni. 4) Kawnpui Sub-Division hnuaia khawtina BNRGSK building sak hna pawh zawh fel vek tawh a ni. 5) Kawnpui Kanan veng leh Hmar veng a NLUP Godown pawh IWMP hnuaiah sak zawh tawh a ni. 6)Police Station Rs. 42 lakh seng a sak zawh tawh niin, nikum November thla khan luah tan tawh a ni. 7) Kawnpui ah hian Boys Hockey Academy Astro Turf phah tura hma lak mek a ni a. Site development zawh tawh niin, tunah hian Turf phahna tur atan Boulder Filling 90 % zawh fel tawh a ni a. Tin, turf pawh Germany atanga lak luh tum niin, chah mek a ni a. Turf phahna bik atan hian Rs. 420 lakhs ruahman a ni. 8) SDEO Office tur kum 2009 a Rs. 13 lakhs senga sak tan pawh kum 2011 khan luah a ni tawh bawk. 9) Tui tlan lai - Tuitun - Highway kawng laihin a tih buai pawh tunah hian PHE lamin a ngai a awh leh thuai theih nan hma chak takin an la mek a, tui hi pump leh thuai theih an in beisei, kumtin kawng laih avanga harsatna an tawh thin hi pumpelh nan Tuitun hnar sang zawk atanga gravity a lak dan pawh Department hian a ngaihtuah mek a ni.

Kan State hmasawnna tura kan hmachhawp lian pui pui te hi a hlawhtlin nan mipui, sorkar hnathawk leh kohhran hruaitute, tlawmngai pawlte tanpuina leh thawhhona kan mamawh dawn a, chumi atan chuan vawiinah hian in mi thawhpuina kan ngen a che u a. Tin, he Ni ropui tak lawm tura lokal zawng zawng, zirlai naupang duhawm tak tak March Past rawn nei ta te, sorkar hnathawkte, tlawmngai pawl hruaitute, kohhran hruaitute, khawtlang hruaitute zawng zawng chibai ka buk che u a, ka duhsakna ka hlan a che u.