India ramin zalenna a hmuh champha vawi 65-na chu vawiin Dt. 15th 2012 hian Mamit khelmualah roui takin lawm a ni a. He hun hi Pu P.C. Lalthanliana Minister, LAD etc. chuan khuallian nia hmanpuiin zing dar 10:00 ah India Hnam Puanzar pawtpharhin Parade Contingents 17 te hnam puanzar chibai buk a chhang let a ni.
Khuallian chuan thusawiin kan ram tana zalenna sualtu mual liam tawhte thinlung takin kan chhuangin kan hrereng a ni a ti a. Zalenna hnuaia tualleng mek keini khua leh tuite hian hruaitu kal hmasate rilru ngaihtuah chunga kan nun te kan chhutlet a pawimawh a ni a ni.
Khuallian chuan Mizoram sorkar in hmasawnna tura hna a thawh hrang hrang te tarlangin hmasawnna kipui atana sorkar ruahman - NLUP chu chak taka kalpui a ni tiin kumhnih kalta chhunga NLUP dawng tura thlan tawh chhungkaw 90,139 belhchhah turin kumin chhung hian chhungkaw 29,861 thlan belh an nih tur thu a sawi a. Planning Commission pawhin hei hi min hlutpuiin kum 2011-2012 khan cheng vaibelchhe 234 ruahman anih laiin kum 2012-2013 atan cheng vaibelchhe 370 zet min ruahman sak a ni a ti bawk. Mizoram New Contributory Pension for Un-organised Employees and Worker (NPS-LITE) Scheme 2010 chu hmang tanin he scheme hnuaiah nitin inhlawhfa chawp ten an upat hunah pension an nei thei dawn a ni a ti bawk.
Khuallian chuan inkalpawhna lam, Emergency thilah leh mamawhna phuhru tura Mizoram District Hqrs leh khaw pawimawh zual thlanah te Helicopter Service tir anih thu te, tun dinhmuna Mamit a service tir la nih loh chungchangah a service thuai theih nan thuneituten hma an la mek thu te, inthiarna leh tui thianghlim kan neih theih nana India sawrkarin cheng vaibelchhe 35.95 min rawn pek thu te, Total Sanitation Campaign leh Nirmal Bharat Abhyan (NRB) hnuaiah BPL leh APL chhungkaw tana ekin tha siam hna chu 84.42 leh 92.24 zeta pungin kumin kum tawp a Nirman state ni hman turin sawrkarin theih tawpa chhuah thute, zirna chungchanga hmalakna hrang hrang ah Lawngtlai leh Mamit District ah te hnam te nau zawkte pualin Residential school pahnih(2) cheng nuai 147.64 senga sak anih thu te, infiamna lama thalaite talent phochhuah na tura sawrkarin Catch Them Young a kalpui thu te Aizawl khawpui solar city a puan anih tak avangin Ministry of New & Renewable Energy chuan Solar City Cell dinna turin cheng nuai 48.09 min pek thu te khuallian chuan a sawilang bawk. Khuallian chuan hmasawnna hna khairual zawka a kal theihna turin District Council nei ve lo District dangte tan pawh District Planning Board- heng District Serchhip, Champhai, Kolasib, Mamit leh Aizawl District a Rural Area bik tan a din a, Chung District paliten an thawh theih na turin bul tan nan cheng vaibelchhe khat (1) theuh ruahman anih thu a sawi bawk. Lawngtlai leh Mamit District te hi ram chhung District hnufual 92 tanpui turte zingah a tel avangin District Level Co-ordination Committee kaihhruaina hnuaiah hmasawnna Rs. 21.64 crores sengin Mamit District-ah thawh mek anih thu a tarlang bawk a ni.
Khuallian chuan zalenna ni lawm tura mipui lo kalkhawm zawng zawngte ram hmangaihna rilru pu a, in lungrualna nena ram hmasawnna tura theihtawp chhuah turin a sawm bawk a ni. Independence Day 2012 lawmmna Parade Contingents 17 te zingah- 1st JNV School, 2nd New Diamond School leh 3rd chu Govt Mamit High School (Boys) te an ni.
Khuallian hian Mamit Damdawiin tlawhin damlo 19 te hnenah thilpek a hlan bawk a ni.
Tourist Lodge, Mamit ah chhun 12:00 (noon) hian sawm bikte pualin VIP’s at Home buatsaih a ni bawk.
Independence Day 2012 lawmna chi khat Football(men) leh Volley Ball(men & women) final khelh a ni bawk.
