Tukin zing dar 8:00 khan India Republic Day vawi 64-na chu Champhai Kahrawt Field ah hman a ni a, Pu Lalthangpuia Sailo IAS Champhai District Bawrhsap chu khuallian a ni.Republic Day lawmna ah hian parade contingent 8 (pariat) ten Hnam Puanzar chibai an buk chu chhang letin khuallian Pu Lalthangpuia Sailo IAS chuan kalkhawmte hnenah Republic Day thuchah a sawi.

Republic Day champha vawi-64na Champhai District a hmanna ah hian khuallian District Bawrhsap chuan India ram in kum 60 chuang zet chhunga hma a sawnna hrang hrang sawiin Mizoram ngei ah pawh kawng tam takah hmasawnna sawi tur thahnem tak a awm thu leh Champhai pawh District a nihna kum 15 lai lo tling ve ta in district dangte ke pen rualin hmasawnna kawngah ke a pen ve zel ani tiin , department hrang hrang thawhhona te, mipui tawiawm thatna te hi hmasawnna atana pawimawh tak mai anih avangin vawiin Republic Day lawmna denchhen hian kan ram India, Mizoram leh Champhai District hmasawnna tur atan inpekna thar nei theuh turin mipuite a ngen a ni.

Khuallian chuan Champhai District chhunga hmasawnna hrang hrang sawilangin RKVY Scheme hnuaia Agriculture hmalakna in Land Development Work hmangin ram zawl leh awih tlanah ram 100 Ha.ve ve a zau siam a niin, he sheme hnuaiah vek hian Fisheries Department chuan Sangha dil leh Nursery thar engemaw zah a siam bawk a.Industries Department chuan thingtlang nulate 60 te tan laphiar training a pe a, Champhai District Hospital building khum 100 awm theihna tura ruahman pawh sak zawh thawkhat tawh a ni a ti a. School Education department hnuaiah SSA hmangin zirlai naupang 22014 hnenah zirlai bu a thlawna sem a niin Community Mobilisation hmangin mi 556 te training pek an nih thu a sawi bawk.

Sports lam hmasawnna atan kan sawrkar chuan Chhangphut Field ah Phul lem (Artificial Turf) phah mek chu tunah hian 60% vel thawh tawh ani tiin, Infiammi te tana hmasawnna tangkai tak Vanlallawma Indoor Stadium pawh hawn a lo ni tawh a ,Polytechnic building, Tlangsam-a sak pawh hawn mai theih tura ruahman mek anih thu leh Economics & Statistics in Champhai District tan a District Research office a rawn hawn thar leh Rural Water Supply Scheme hmangin NRDWP Champhai-ah thingtlang khaw 92 ten tui hnianghnar an hmuh theih na hmun 14-a hmathawh chu zawh thuai beisei a niin Vety Department chuan Ran talhna In sa turin Tuipui hnarah hma a la mek a, fur chhiat lai ber pawha kawng tha kan neih theihna chhan hi BRTF leh PWD te thawhrimna a ni khuallian chuan a ti .

Department hrang hrang te hmalakna hlawhtling tawh tak tak te leh hmachhawpte sawilangin zelin khuallian chuan kan sawrkar flagship programme NLUP ah department hrang hrang 8 kaltlangin trade hrang hrang-ah chhungkaw tamtakin NLUP hamthatna an dawn dan report a pe nghal a, NLUP hlawhtlinna atana sawrkar tawimawm turin mipui a sawm nghal a ni.

Vawiina Republic Day lawm thei tura India ram tana zalenna sualtu, mi ropui kal tate rilru ah hrerengin keini pawhin kan theih tawkah ram ti chhetu ni lova a siamthatu ni theuh turin khuallian hian mipui kalkhawmte chu a chah.

Kumin Republic Day lawmna ah hian Parade contingent tinte hnenah leh Republic Day puala infiamna a tithate hnenah lawmman sem nghal a ni.