Vawiin India Republic Day vawi 65-na lawmna inkhawm Aizawl Sipai Lammuala neihah Khuallian Mizoram Governor Pu Vakkom B. Purushothaman chuan Republic Day parade a commander-te leh contingent tithate bakah he ni denchhen a infiamna buatsaih hrang hranga tithate hnenah lawmman a sem a ni.
Vawiin Republic Day lawmnaah hian Parade Contingent 23 – Armed Contingent 4, Unarmed Contingent 5, School Contingent 10 leh Band Party 4 ten lam an entir a. Parade Commander chu Zonun Sanga, Dy. SP (Probationer) a ni a, 2nd Commander chu Jacob Hlychho, Dy. SP (Probationer) a ni. Contingent hrang hrang atanga lawmman dawngtute chu:
I. Armed Contingent: 1) 1st Bn. MAP ; 2) 1st Bn. CRPF ;3)3rd Bn. MAP
II. Unarmed Contingent: 1) Ex-Servicemen ;2) Hrangbana College NCC ;3) – Pachhunga University College NCC
III. School Contingent: 1) Home Mission School ; 2) Govt. K.M. High School ; 3)Staines Memorial School
Republic Day puala infiamna chi hrang hrang buatsaih a titha te hnenah a hnuaia mi ang hian lawmman sem a ni:
I. Hockey Tournament (Boys): Champion – Boys Hockey Academy, Kawnpui ; Runner-up – 1st Bn. MAP
II. Hockey Tournament (Girls): Champion – Ruby Ropuiliani Hockey Club ;Runner-up – Kawnpui GSA
III. Badminton Tournament (Men): Champion – Mizoram Police Badminton Club-Lalmuanawma & Samuel ; Runner-up – Health Department - Lalhmingsanga & Lalrindika
IV. Badminton Tournament (Women): Champion – Chaltlang Sporting Club - F. Vanlalhriatpuii & Lalrinzuali; Runner-up – Zotlang Badminton Club - Lalhlunchhungi & Hmingthianghlimi.
Vawiin hian Mizo zingah National Award dawngtu mi engemawzat an awm bawk a. Fire Service Medal for Gallantry chu Fireman C. Lalawmpuia, Fireman Lalnghahmawia leh Fireman B. Vanlalruattluanga te hnenah hlan a ni a. Anni pathum hian nikum May ni 11, 2013-a Laipuitlang leiminah an nunna hial chan huam a chhiattawkte chhanchhuahna kawnga an thawh that avangin chawimawina hi hlan an ni a. Mizoram Fire Service atanga ‘Fire Service Medal for Gallantry chawimawina dawng hmasaber an ni bawk.
President’s Police Medal for Distinguished Service chu Pu L.H. Shanliana, DIG-Southern Range hnenah hlan a ni a. Presidents’ Police Medal for Meritorious Service chu Inspector Jimmy L. Renthlei, Inspector K. Laltluangliana leh Inspector V.L. Hmangaihzuala te hnenah pek a ni bawk.
Republic Day denchhen a India President-in Padma Awards dawng tur a mi 127 a thlan zingah Mizoram atangin Pu Chhuanvawra Chhakchhuak chu Literature & Education-a a thawh hlawk vangin Padma Shri dawng tur a thlan a ni.
