Rampum rualin vawiin khan Lunglei-ah pawh India Republic Day vawi 65-na lawmna chu Thuamluaia Mual-ah neih a ni a. Lunglei Bawrhsap Pu V.Sapchhunga, IAS chu Khuallian niin hnampuanzar a pawtpharh a ni.Vawiin Republic Day 2014 lawmnaah hian Lunglei HPC Vice-Chairman Pu S.Laldingliana leh Lunglei West bialtu MLA Pu Chalrosanga Ralte te pawh an tel a ni.

Republic Day 2014 Ceremonial Parade contingent-te salute a chhanlet hnuah Khuallian chuan thu sawiin Lunglei District mipuite chibai bukin duhsakna a hlan a, ram tana inpek leh tanlak thar chu ram mipui zawng zawngte tihmakmawh a ni, a ti. Khawvel ram dang rualin India pawhin hma a sawn zel a, Mizoram pawh kawng tinrengah nasa takin hmasawnin Lunglei District ngei pawhin hmasawnna hmel duhawm tak tak a hmu chho zel a ni tiin Bawrhsap Pu V.Sapchhunga chuan Department hrang hrang hmalakna leh hlawhtlinna te a tarlang a ni. Mizoram sorkar programme pawimawh tak NLUP 1st Phase-ah Mizoram pum huap khawmal ti tha lawmman 1-na leh 2-na chu Lunglei District atangin an nih chu a lawmawm tak zet a ni, a ti a. Lunglei SP Office leh DIG (SR) Office building thar leh mawi tak hawn a ni thei chu a lawmawmin thil chhinchhiah tlak tak a ni, a ti. Lunglei District chhungah PWD ten Lunglei-Tlabung-Kawrpuichhuah kawngpui chu double-lane a siam tura hmalakna te, Buarpui-Thenhlum-Tuichawng leh Chhumkum-Chawngte kawngte chu World bank tanpuinain tih puitlin a nih thuai theih nan mipuite tawiawmna tha a pawimawh thu a sawi a. P&E leh PHE Department-ten mipui mamawh eng leh tui pek lamah theihtawp an chhuah thinnaah lawmthu a sawi bawk. Lunglei District atana High Power Committee-in hmalakna hrang hrang a neihte chuan District tan rotling tur thil tam tak a siam mek zel a; UD&PA department ten mi harsa chenna neilote tan chenna in tam tak a sak sak te hi a vanneihthlak a; Social Welfare Department hmalaknain Tan pension mi 5359 hnenah pek a nih chu a lawmawm hle a ni, a ti. Sport Department hmalaknain Theiriat, Zobawk, Pandawng leh Serkawn-ah stadium puilting din tura hmalak anih mek thu te; Excise & Narcotics Department ten ruihlo dona kawngah chak taka hma an lak mek thu te; sorkar hmalakna puanzar kawngah Information & Public Relations Department leh Media hrang hrang ten theihtawp an chhuah thin chungah lawmthu a sawi a. Sorkar hmalakna leh ruahmanna hrang hrang tihlawhtlin nana kohhran, tlawmngai pawl leh khawtlang hruaituten lungrual taka an thlawpna leh thawhhona chungah lawmthu a sawiin hun lo kal zel turah pawh sorkar tawiawma thawhpui turin a sawm bawk a ni.

Vawiin Republic Day 2014 lawmnaah hian MAP, MRHG leh school hrang hrang atangin parade contingent 18 bakah Assam Rifles leh MAP ten band party an nei ve ve a, Republic Day lawmna ti ropuitu leh tihlawhtlingtu an ni tiin Lunglei Bawrhsap chuan an chungah pawh lawmthu a sawi a ni.

Republic Day 2014 ah hian DIG (SR) Pu L.H. Shanliana, IPS Lunglei chu Presidents’ Police Medal for Distinguished a dawng a ni.