India ramin mahni a ro a inrelna ni, India Republic Day Vawi 65-na chu vawiin khanMamit khelmualah ropui takin lawm a ni a. Khuallian Pu V. Lalremthanga IAS District Bawrhsap chuan zing dar 7:30 Am ah India Hnam puanzar pawtpharhin Armed Contingent 1, unarmed 1, leh School Contigents 8 ten hnam puanzar chibai an buk a chhang let a ni.

Thusawiin khuallian chuan India ramin mahni a ro a inrel tan ni lawm tura mipui lo kal zawng zawngte Republic Day chibai bukin Mamit District-in chhiatna rapthlak sawi tham tawng lova kum hlui kan hmang liam ta kha a lawmawm hle a, Kum hluia State Legislative Assembly Members te thlanna General Election tluang taka kan neih bakah District chhunga mi MLA pahnihte Minister dinhmun chantir an han ni ta hi kan District tan thil chhinchhiah tlak leh lawmawm tak a ni a ti bawk. Hetih lai hian misualten kan District chhung tangin mi pathum November 23, 2013 a an rukbo a vanga rukbo chhungte mai nilo, kan District leh Mizoram pum mipuite min nghawng dan erawh kha chu theihnghilh rual a ni lo, tunah mi pahnih chhuah tawh mahse an la hren pakhat hi an chhuah leh hma chuan Mizoram mipuite lung a awi dawn lova, Mizoram a chengte thlamuang tak leh luangrual taka kan khawsak ho zelna atan hetiang thil hi thleng tawh lo se kan tiin chumi vawng tur chuan sawrkar leh mipuite kan in kau vek tawh a ni tih i hre nawn leh ang u a ti bawk.

Khuallian chuan sawrkar in Department hrang hrang kaltlanga Mamit District-a hmasawnna hna a thawhte tarlangin MGNREGS hnuaiah ni 59 inhlawhna pek niin Material Component hmangin Retaining wall, Water tank, Workers Rest-Shet te khaw engngemaw zatah siam a ni tawh a. NLUP dawngtute thlawhhma kawng laihsak mek anih thu a sawi. Sawrkarin mipuite hriselna a ngaih pawimawh thu tarlangin Mamit District-ah Sub- Centre 6 sak zawh tawh a ni a, khaw 8-ah sak mek niin Kawrtethawveng khua-ah PHC sak mek a ni bawk a ni a ti.

Khuallian chuan sawrkarin ram chhung mipuite himna tur a ngai pawimawh in Police te pawh changtlung taka thuam chhoh mek anih thusawiin Mamit Police Staff zawng zawngte Crime & Criminal Tracking Network System (CCTNS) hnuaiah IT hmanga Crime chungchang awlsam zawka chinfel dan training pek vek an ni tawh a ni bawk.

Khuallian chuan nikum 2013 MLA inthlanna-ah khan Mamit District chu Mizoram chhung District 8-ah Vote thlak thatna ber niin Vote nei 87.48% in vote kan thlak a, a lawmawm tak zet a ni a ti a, Mizo nun ze mawi thianchhan thih ngam hnam kan nihna pholanga huaisen chawimawina dawngtu te, Malsawmtluangi 13 yrs D/o Lalduhawmi Lengte, Hani Ngurdinthari 15yrs C/o Dengrikhumi Lengte, Vanlalhruaia 10 yrs S/o Lalramnghinglova (L) leh Lalchhuanliana, 9yrs S/o Lallungmuana, Bawrai te kan chhuangin kan chawimawi a ni a ti.

Khuallian chuan sawrkarin hmasawnna hna a thawhna a piangah rinawm leh taima taka thawka sawrkar tawiawm turin Mamit District mipuite a sawm bawk a ni.

Parade Contingents zingah hian 1st-na JNV School, 2nd-na St Francis of Assisi High School niin 3rd-na chu Government Mamit High School Cl-X te an ni Parade Commander hi P.C Laltanpuia , MPS a ni.

Huaisen chawimawina (citation) leh Parade Contingents lawmman te hi Pu V. Lalremthanga IAS, khuallian in a sem a ni.