Vawiin zing lam 7:30 Am hian Lawngtlaia Central YLA Ground-ah India ram Republic Day Vawi 65 na chu ropui taka lawm a ni a, Deputy Commissioner Pu J. Hmingthanmawia chu khuallian niin hnam puanzar a pawt pharh a, hnam puanzar chibai buktu parade contingent te chibai a chhanglet bawk.

Thusawiin khuallian chuan ‘vawiin niah hian India ramin zalenna a hmuh theihna tura heih tawp lo chhuah tawhtute, nunna chana zalenna sualtute rilruah lo thar lehin an inpekna avanga hetiang dinhmun ropui taka ding thei kan ni tih hi hre thar lah theuh ang u’ a ti a, he hun hi ram tana inhlan thar lehna niah hmang theuh turin kal khawmte a sawm a ni.

Lawngtlai District chuan kum 16 hmel a lo hmu ve ta a, District naupangte ni mahse hmasawnna kawngah nasa takin a thang chho tawha, tunah pawh chung hmasawnna hmachhawp tam tak a la awm a ni tiin Lawngtlai District chhunga sawrkarin hmasawnna ruhrel a ruahmante leh a thawh mekte a tarlang bawk.

Republic Day vawi 65 na lawmnaah hian Mizoram Police leh Lawngtlai khawpui School hrang hranga mi Parate Contingent 16 ten hnam puanzar chibai bukna an nei a, heng Parade te hi Dy Superintendent of Police Tv. Zarzoliana, MPS chuan a command a ni.

Hei bakah hian LADC hnuaia zirtirtu tha thlanchhuah mi pahnihte hnenah khuallian hian lawmman a hlan a, Republic Day puala infiamna hrang hranga tit hate hnenah lawmman a sem bawk.