Vawiin khan Kolasib Tumpui field-ah Republic Day 2014 ropui taka lawm a ni a. Khuallian Pu Jitender Yadav, IAS, DC Kolasib chuan zing dar 7:15 khan hnam puanzar pawtpharhin Parade contingent te chibai buk a chhanglet a ni.

Thuchah sawiin Pu Jitender Yadav chuan, India ram ropui takah hian Mizoram chuan boruak muanawm tak hnuaiah hmasawnna chhinchhiah tlak tak tak a nei a ni, a ti a. Tun hunah hian a zavaia sawilan sen nilo mahse a tlangpui chauh ka tarlang dawn a ni tiin hun lo kal zel tur atan pawh sawrkar leh mipui thawh hona tha kan neih chhoh zel hi ka duh a ni, a ti a. Mizoram sawrkar NLUP kenkawh mekah Kolasib District-a Line deptt. te chuan an titha hle tih sawiin kan District chhung atanga farmer titha ber ber kan nei te kha a lawmawm hle a ni, a ti a. Mizoram sawrkarin kum 2012 –a Buh thar tam kum a puan bawhzuina kal zelah kum tin buh thar a pung chho hret hret a. Kum 2012-13 chhung khan Kolasib District chhunga leilet leh tlangram lo, 6161 ha. atangin buh 9923 metric tone thar chhuah a ni. Kut hnathawktuten Oil Palm an thar chhuah sawngbawlna turin Bukvannei-ah Oil Palm Factory bun zawh tep a ni tawh a, March 2014 khi chuan hawn theih beisei a ni, a ti.

District Rural Development Agency (DRDA) chuan mipuite harsatna chhawk zangkhai nan inhlawhna tluang takin a kalpui a. MGNREGS hnuaiah Job Card mi 16621 hnenah a pe a. MGNREGS hnuaiah kumin chhung hian tuikhur siam leh tuikhuah te, ram ngaw siam te uar taka kalpui a ni a, Kolasib Project Venga Bakpuk hmunah lawiluhna hmun nuam tak he scheme atang hian siam a ni, tiin.Excise & Narcotics Deptt. chuan Zu leh Ruihhlo do kawngah theihtawp chhuahin kum 2013 chhung khan chhiah, Rs 25,46,762/- sawrkarah an chhunglut a. Environment & Forest Deptt. chuan ram vah chereu ti ngaw leh turin hma nasa takin a la a, Kum 2012 atanga December 2013 thlengin Forest Deptt. hian sawrkarah Revenue Rs 84,03,587/- an chhunglut a ni, Pu Yadav chuan a ti.

Local Administration Department hnuaia Village Council 45 hnenah Deptt. chuan khawtlang tih hmasawn nan 2012-2013 chhung khan Thirteenth Finance Commission sum te a pe chhuak a, LIC Housing Loan pawh hemi kum chhung hian chhungkaw 25 hnenah a pe bawk. SSA Mission, Kolasib District chuan 2013-2014 Academic Session atan School naupang 13,688 hnenah a thlawnin text book a pe a, naupang 14,707 hnenah a thlawnin uniform a sem bawk. School naupang rethei zualte tan hmeichhe naupang 50 awm theihna Residential Hostel a kalpui bawk a, CWSN Friendly Toilet, Rs 23875/- man zel school 85 hnenah SSA Mission hian a tihsak bawk a ni. UD & PA hnuaiah Kolasib khawpui chhunga chenna In tha neilo chhungkaw 300 In sak sak an ni a, Khawpui chhung kawng tha tak siam a ni bawk. Khawpui chhung mi harsa BPL chhungkuate leh Self Help Group te chu inhlawhfakna, Skill Training leh Subsidy Loan hmangte-a khaichhuah mek an ni a, Bawlhhlawh sawngbawl dan changtlung- modern method kalpui tum mek a ni, a ti bawk.

Republic Day lawmnaah hian parade contingent 12 zingah Uniformed contingent atangin 1na NCC Boys, St. Johns Higher sec school an ni a, 2-na Scouts & Guides, SJHSS leh 3-na MRP te an ni. School contingent atangin 1na JNV Thingdawl, 2na St. Johns HSS leh 3na CM High School te an ni. R-day Basketball ah Jordians Team, Kolasib te an champion a, Diakkawn Basket ball team ten runner up trophy an la a. Cricket Junior-ah Seven Star Cricket Club, Kolasib te an champion a, runner up chu Gurkha Cricket Club an ni. Man of the tournament-ah Manjit Singh, Gurkha C. Club thlan a ni. Cricket Senior-ah United Cricket Club Kolasib te an champion a, Kolasib Cricket Club chu pahnihna an ni. Man of the tournament ah Arbind Singh UCC, Kolasib thlan a ni bawk a ni.