Mizoram khawthlang lama ni 23.11.2013 a NLFT leh BDFM inti ten mi 3 an rukbona hmun Chikhaa Mizoram sorkar-in Police Outpost siam a ruahman chungchang bawhzuiin Home Minister Pu R. Lalzirliana leh Parliamentary Secretary Lt. Col.(Rtd) Z.S. Zuala te chuan Inrinni 25.1.2014 khan Chikha an tlawh a, Police Outpost siamna tur hmunhma te enfiahin chak taka bawhzui anih theih nan hma lak dan tur an rel. Chikha hi Dampa Tiger Reserve chhunga awm anih avangin Environment & Forest Department hnuaia Wildlife hotute nen sawiho nise an ti bawk. Chikha ah hian ni 29 November, 2013 atang khan 5th IR Bn Platoon 1 dah lailawk an ni tawh a, an awmna hmun ah hian Police Outpost nghet dah tura ruahman a ni.

Dampa Rengpui ah khawtlang hruaitu leh mipui ten Minister hi an lo hmuak a, inkhawmna tawite neihpuiin NLFT leh BDFM inti ten mi 3 an rukbo avanga pawisawilo Bru mipui ten harsatna leh chhiatna an tawrh theihna laka veng tura theihtawpa hma a lakna ah lawmthu an lo hrilh a ni. Minister chuan Mizoram-in harsa taka remna leh muanna a neih tichhe zawnga chetna zawng zawng chu Sorkar-in a dodal tlat thu leh Police ten an dim dawn loh thu a sawi a, bru mipuite chu thlamuang taka awma, misualte chetna do tlata Mizoram Police te chu tha taka lo thawhpui zel turin a chah bawk.

Minister leh Parliamentary Secretary te hi Pu V. Lalthakima, DIG (Hqrs.); Pu Neihchungnunga, AIG II; Pu Rodingliana, SP, Mamit; Pu Lalruaia, Dy. Commandant, 5th IR Bn.; Pu Laltlanhlua, Field Director, Dampa Tiger Reserve leh official dang ten an tawiawm a ni.