Vawiin khan Mizoram Governor Pu Vakkom Purushothaman leh a nupui Dr Lily Purushothaman chuan Raj Bhavan ah Aizawl a nau hnuchham In hrang hrang a naupang te lengah sawmin thingpui ruai a kilpui a, Chief Minister Pu Lal Thanhawla te nupa, Addl. Chief Secretary Pi M.Sathiyavathy, IAS leh sawrkar mipawimawhte an tel a ni.

Governor chuan Naupang chanhai zawk leh nau hnuchham Ina cheng ten an mit ngeia Raj Bhavan an hmuh theih nan leh thawktute nena inpawhna tha tak an neih theih nana he hun hi buatsaih a nih thusawiin, Raj Bhavan chu state chhung sorkar hmunhma pangngai dang ang bawk a nih an hriat theih nan te, mamawh nei leh a duh apiangin Governor chu a hmuh theih a ni tih an hriat theih nan buatsaih a ni, a ti.

Governor chuan hun reilote chhungin Mizote chu mi lainat thiam mihring puite chunga thatna chhuah duh mi an nih zia a hmuh thu a sawi a, Mi chanhai zawk leh rahbi tleute pawh kohhran leh tlawmngai pawl ten an dawm kang thin te hi Mizote thinlunga lian ber fo thin Tlawmngaihna lan tirtu niin midangte tana hawihawm leh thatchhuah te, ngilneih, mahni hma sial loh leh tanpui ngai te tanpui duhna thinlung a ni, a ti a. Mizo tualzal nunah he zia hi chhawm nun reng niin chhuan thar zelah pawh vawn him tlat a ni a, thang leh thar zelte hnenah pawh tun amite hian an hnutchhiah zui zel pawh ka ring tlat a ni, a ti bawk.

Vawiina naupang lokal khawmte hian thiam bik leh zei bik tam tak an nei a. Heng thil pek an dawn te hi ti thanglian zel turin a fuih a. Ram leh state nakin hun tur hi an ni chungah hian a innghat a. Thawhrimna leh inpekna nen mahni inrintawkna thinlung pu a hmathlir eng tak nei turin a chah bawk. Harsatna engemaw a thleng mai thei. Mahse heng hian kan rilru a ti hnual tur a ni lova, kan thil tum thulh phah nan kan hmang tur a ni hek lo. Kan tumruhna leh tawrhchhel zia fiah tu atan kan hmang hlauh zawk tur a ni. Ngaihtuahna changkang tak neiin, i tum sang phawt sela, i theihna in a tlin a ni tih ring nghet tlat ang che. In that lai hun ah hian kan naktuk hun tur chu in kutah a awm a. Vawiina i ngaihtuahna leh chet phung hian i nakin hun tur a hril thin. Kan ram chu mipui rorelna ram, mi tin chanvo leh nihna intluk tlanna ram a ni a. Mi awm thei leh khawpuia chengte chauhin hlawhtlinna an nei thei bik lo. India ram chanchinah hian hmun i luah ve thei a. I tum ruh phawt mai se, lehkha zir tha la, inpekna leh taimakna nen kum reilote chhungin i thawhrimna chuan ram leh hnam tan hlawhtlinna a la thlen ngei dawn a ni tiin a fuih bawk.

Chief Minister Pu Lal Thanhawla pawhin Governor in Raj Bhavan ah mi pawimawh bikte a sawm chu lawmawm a tih thu sawiin naupang chanhai leh chhawmdawl ngai zawkte enkawl tur hian Pathian in mi hrang hrang a ruat thin a, chung mite chungah chuan lawm nachang hre thin turin naupang te chu a chah.

Vawiin inkhawm ah hian TNT, Zuangtui; Spastic Society; Muanna In; Hermon’s Children Home; Gan Sabra; Motherless Babies Home; MTP, Khatla leh Friend of Children atangin naupang leh an hruaitute an kal a ni.