Vawiin chawhma dar 11:00 khan Chhangphut Field, Champhaiah District Bawrhsap Pu Vanlalngaihsaka IAS hovin India Republic Day vawi 68-na urhsun taka lawm a ni a, Bawrhsap hian Republic Day lawmna hmun a thlen veleh India hnam puanzar a pawt pharh a, hemi zawh hian Republic Day Ceremonial Parade Contingent 20 ( Unarmed Contingent-4 leh School Contingent-20) te chu endikin Parade Commander Sub-Inspector Jerry Lalduhawma Punte kaihhruai March Past parade contingent te chibai buk a chhanglet nghal a, Govt. Champhai Vengthlang Middle School Scouts & Guides Pipe Band in India hnam hla an rem bakah March Past neih laiin rimawi an tum bawk a ni.

District Bawrhsap Pu Vanlalngaihsaka chuan Republic Day thuchah sawiin Champhai District mipuite duhsakna chibai a buk a, India ram Danpui duang chhuaktu Dr. BR Ambedkara chawimawi anih thu a sawi bawk.

District chhunga Sawrkarin hmasawnna hna a thawh hrang hrang te tarlangin Bawrhsap chuan Sawrkar Flagship Programme “NLUP” thawh thumna leh thawh lina kalpui mekah Champhai District atangin beneficiary 1706 an awm thu a tarlang a, Mizoram sawrkarin hmasawnna tluantling tur ruahmanna thar “New Economic Development Policy (NEDP)” chuan NLUP hlamchhiah lova a tuamhlawm zawk tur thu leh he policy thar hian Mizoram chu dinhmun tha zawkah a hruai luh ngei dawn thu a sawi bawk.

Champhai Govt. College chu National Academic & Accreditation Council-in tehfung hrasng hrang hmanga an the hnu in B++ Grade pek an nih thu leh hei hi Mizoram College zingah a sang ber anih thu te, College zirlaite tan Spoken English, Hindi leh Burmese kalpui anih thu leh Computer Course (CCC) kalpui anih thu a sawi bawk. Sawrkarinj BPL Baseline Survey 2016 a buatsaih ah Champhai District chu Survey Report thehlut thei hmasa ber an nih thu leh District chhunga khaw hrang hrang 108 zinga chhungkaw 29403 zingah chhungkaw 2705 (9.20%) chu BPL chhungkua an nih thu a sawi a, Champhai District chhunga khaw panga – Chawngtlai, Pamchung, Rabung, Riangtlei leh Tlangmawiah te BPL chhungkua an awmlo chu t6huil ropui leh chhinchhiah tlak anih thu a sawi bawk.

Bawrhsap chuan Champhai District chhungah MGNREGS hnuaia Job Card holder zawng zawngte Bank Account hawn sak vek an ni a ti a, IAY (PMAY) hnuaiah kum 2016-2017 chhungin mi 54 hnenah in sak tanpuina Rs 75,000/- theuh pek an nih tawh thu sawiin PMKSY (WDC) hnuyaiah Project pasarih kalpui mek anih thu leh hei hian khaw 28 a tuam thu a sawi a, he Scheme hnuaiah hian Champhai District chu Mizoram District zingah District Irrigation Plan siam zo hmasa ber an nih thu tarlangin Bawrhsap chuan hemi a hlawhtlinna tura theihtawp chhuah a lungrual taka hna thawkho Sawrkar Department hrang hrang Agriculture, DRDA, Minor Irrigation, Horticulture leh Soil & Water Conservation Department te chungah lawmthu a sawi a ni.

Champhai District Hospital chu Hospital fai inelna Kayakalp hnuaiah endikna vawithum zet paltlangin Mizoram chhunga Hosptal fai ber a puan an ni tiin Bawrhsap chuan chhuanawm atih thu a sawi a, Biate CHC chu Community Health Centre zingah a fai ber dawttu (pahnihna) an nih thu leh Hnahlan PHC chu Public Health Centre fai ber a thlan an nih thu te, Champhai District chhungah PHC 9 laiin Commendation Award an dawn thu a sawi bawk. Heng bakah hian India rama Ni zung chakna hmanga tui pump na Project lian ber “Kelkang Solar Water Supply Scheme” Rs. Nuaih 631 man chu hawn anih tawh thu te, 5MW siam chhuak thei tur Tlawva Hydel Project, Khawbung ami chu kumin chhunga zawh fel beisei anih thu te, Champhai District chu Mizoram chhunga Open Defecation Free District hmasa ber an nih thu te sawilangin Police Department-in “Tanpuitu Team” din a chhun leh zan chawl lova Champhai khaw chhung a patrolling an nei chuan mipui a venghim nasa in an thlamuanpui em em a ni a ti bawk.

Bawrhsap hian thu a sawi zawh hian March Past Parade contingent te hnenah hian lawmman a sem nghal a, a titha zualte chu : School Contingent-ah Pakhatna – B.C. English Academy Girls Contingent, Pahnihna – G.M. Higher Secondary School Boys Contingent, Pathumna – Holy Cross High School Boys Contingent te an ni a, Unarmed Contingent ah Govt. Champhai College NCC chu pakhatna niin parade contingent zawng zawng hnenah participation prize sem vek a ni.

Vawiin Republic Day lawmna ah hian mimal chawimawina dawng engemaw zat hnenah lawman hlan a ni a, chungte chu :

Golden Arrow Award (Cub & Bulbul) :

CUB- Malsawmzuala s/o Lalbiakliana, Champhai Venglai, Lalchhantluanga s/o Thangriliana, Champhai Venglai, Lalnunhlua s/o Suithanmanga, Champhai Venglai te niin an vai hian Presbyterian English School, Champhai zirlaite an ni.

BULBUL – Vanlalhlimawmi d/o Lalnunpuia, Hmunhmeltha, C.Lawmsangzuali d/o C.Vanlalmawia, Vengthlang North, Lalmawizuali d/o Vanlalngaia, Vengthlang, Lalrintluangi d/o Lalrammawia, Vengthlang, Vanlalpeki d/o C. Lalbiaklura, Vengthlang te niin an vai hian Presbyterian English School, Champhai zirlaite an ni.

Rashtrapati Award (Scouts & Guides)

SCOUTS – Lalrinawma s/o Kapthanga, Electric Veng, Govt. Vengthlang Middle School, Champhai GUIDES – R. Vanlalremruati d/o R. Lalthantluanga, Vengthlang, Govt. Vengthlang Middle School, Champhai Heng ho bakah hian DK Pump Controller siam chhuaktu, Mizoram Science Congress, 2016 a lawman pakhatna la tu leh Indigenious Grassroot Technology & Innovation Competition, 2016 a lawmman pakhatna la tu Pu Zoramchhana s/o Dengkunga (L), chhungte khua hnenah chawimawina hlan ani bawk.

Republic Day pual inkhawm zawh anih hnu hian DC’s at Home chu sawmbikte tan DC Bungalow, Keifangtlangah neih a ni.