Vawiin hian Serchhip Khawtetlang Playground ah Indian Republic Day vawi 68 na chu ram chhung hmun dangte rualin hman a ni a, District Bawrhsap Dr. Lalrozama, IAS chu khuallian niin, Parate Contingent ten hnam puanzar chibai an bukna a chhanglet a ni.

Zing ni chhuah rualin Serchhip District chhunga sawrkar Pisa hrang hrangah India Hnam Puanzar zar a ni a, chawhma lamah Serchhip a Home hrang hrang leh Hospital ah te tanpuina hlan a nih leh hnuin a lawmna pui ber chu zing dar 11:00 a.m ah neih tan a ni. He ni hmang tura kalkhawm mipuite hmaah khuallian chuan, India ramin zalenna a hmuh a, mipui thlante ngeiin ro an relna ram a nih theih nana Danpui fel tak siamtute zahna chibai a buk a, ram rorelna tha avanga India ram chu khawvela ram ropui berte zing ami a nih tak hial thu a sawi. Tun hnai maia Serchhip District in hmasawnna hrang hrang a hmuhte a tarlang bawk a, Mizoram sawrkar Flagship Programme, NLUP hnuaiah Serchhip District ah tanpuina chhungkaw 9524 pek an nih thu a tarlang a, heng zinga chhungkaw 6166 te chu First leh Second Phase a mite niin tanpuina hi pek zawh vek tawh an ni a, a dang chhungkaw 3358 te hi Third & Fourth Phase a mite niin tunah hian kalpui mek an ni, a ti. Kum 2016 chhungin Serchhip ah Tourist Lodge thar te, Boxing Hall thar te, Helipad thar te, District Jail tharte hawn an nih thu te, Auditorium changkang tak mai chu hawn mai theiha peihfel tawh a nih thu leh, Thenzawlah Integrated AYUSH Hospital thar hawn a nih thute, World-class Golf Course buatsaih tuma hnathawh mek a nih thute, Chhingchhip ah India ram huapa School tha tling Sainik School tharah zirlai naupang an luh tan dawn thu a tarlang a. Inkalpawhna tha kan neih theihna tura kawngpui thuam that hna hmun eng emaw zatah thawh mek a nih thute, National Highway 54 chu Double Lane a tihlen tum mek a nih thute, Keitum leh Khawlailung inkara Tuichang Lei chu Double Lane-a a thar dawh a nih tur thu leh Contractor pawh sawrkarin a thlan fel tawh thu a tarlang a ni. Hengte bakah hian Serchhip District chhunga hmasawnna dang tam tak, zirna lama hmasawnna te, hriselna lama hmasawnna te, infiamna lama hmasawnna te, tui thianghlim kan hnianghnar theihna tura hmasawnna te khuallian hian a tarlang tel bawk.

Republic Day lawmna ah hian Parade Contingent 12 awmin, Arm Contingent 1, Un-arm Contingent 1 leh School Contingent 10 an tel a. Khuallian hian Parade Contingent ti thate hnenah lawmman hlanna a nei nghal a, lawmman dawngtute chu: 1na Little Flower Convent School, 2 na Marian High School leh 3 na NCC, Govt. High School Serchhip te an ni.

Hengte bakah hian Republic Day pual hian Assam Rifle ten ralthuam pho chhuahna an nei a, Dog show hmuh nawm tak buatsaih a ni bawk

A lawmman pui ber hman zawh hian At Home Tea Party, khuallianin a buatsaih chu DC Bungalow tualah sawm bik ten an nei zui leh a ni.