Vawiin khan khawvel hmun dang rualin Champhai Environment & Forest Department chuan DFO office chamber-ah International Biological Diversity Day an hmang. He hun hi Asst. Conservator of Forest Pu PC Laltanpuia'n kaihruaiin, Addl. SP Pu VL Lura Hauzel chuan kumin thupui "Biodiversity for Sustainable Development" chungchangah thu a sawi a ni.

Thusawitu Champhai Addl. SP chuan mihringten hmasawn tuma kan beih vak vaknaah hian keini leh kan tu leh fate tana harsatna lian tak kan siamchhuak thei thin tih hi kan hriat thar tlan a ngai a ni, a ti a. Hmasawnna hmingin factory lian deuh te emaw sak chuab mi tam tak tan eizawnna leh hausakna pawh thlen mahse ramngaw leh nungcha ti chereutu a nih mai bakah a bulhnai tui in tlakloh a siamtu a ni thei a ni, a ti a. Ramngaw leh nungcha humhalh tura dan kenkawh kawngah Police Department chuan Forest Department nen thawhhona tha tak neih zawm zel a duh thu a sawi bawk.

He hun kaihruaitu Pu PC Laltanpuia chuan ramngaw leh nungchate hi mihring nena chengho tur kan ni a, kumin thupui pawhin hmasawnna ngialnghet atan thilnung zawng zawngte hi an pawimawhzia a tarlang a ni, a ti a. Ram dang experience atangin tuna ramhmul thenkhat, a tangkaina kan hriat mailoh te pawh hi khaurei ah chuan damdawi tha tak a ni tih la hmuhchhuah hun pawh a awm thei a ni, a ti.

Vawiin International Biological Diversity Day hmannaah hian Champhaia Department hrang hrang hotute leh MJA member te bakah sawm bik dangte an tel a ni.