Khawvel hmun dangte rualin vawiin khan Champhai Environment & Forest Department buatsaihin “International Day for the Preservation of Ozone Layer, 2015” chu DFO Office-ah hman a ni a. He hunah hian Sorkar office hotute leh tlawmngai pawl hrang hrang hruaitute leh thuthar lakhawmtute an tel a ni.

Ozone Layer Day hmanna inkhawm hi Champhai DFO Pu Vanlalchuailova chuan kaihruaiin, he ni hman chhan a nih dan a sawi a. Kum 1991-a Montreal rama Ozone tichhe thei thil chi hrang hrang zawi zawia hmang tlem tur leh hun bituk a lo thlen a hmang tawhlo hmak tura in tiam hmasa ber zingah India ram chu a tel ve thu leh, hemi kawnga hma la tha ber tu zingah a tel thu a sawi a. Nunna atan hlauhawm thei UV rays lo dangchattu ozone layer chu mihring te hmasawnna avanga kan thiltihin a tih chhiat a nih thu leh, siamtha tur chuan hun leh tha leh sum tam tak a a ngaih thu a sawi a. Chuvang chuan hmasawnna atan hmalakna engpawh siam dawn ila, environment a nghawng theih dan hi chhut zel a pawimawh thu leh, mahni mimal nunah pawh kan khawvel siamtha turin mawh kan phur vek tih kan hriat a tul a ni, a ti.

Pu PC Laltanpuia, ACF chuan khawvel nunna atan Ozone Layer pawimawhna leh he layer tihchhiat a nih dan te leh mihring leh nungcha tana a hlauhawm dan bakah siamthat nana hmalaknate chipchiar takin a sawifiah a. Ozone chungchang chauh nilo, ramngaw vah chhiat chungchang te, ram tihkan chungchangah te leh nungcha leh tuihna humhalh chungchangah te hian ram zimte kan suasam dan hian nghawng a neih vek thu leh kan inngaihtuah ngun a tul thu a tarlang bawk.

International Day for the Preservation of the Ozone Layer hi September ni 16, 1995 khan hman hmasak ber a ni a. Kum 1987-a Ozone Layer tichhe thei thil chi hrang hrang leh heng thil te hmang tlem tura Montreal Protocol an sign denchhen in UN General Assembly chuan September ni 16 hi Ozone Layer humhalhna atan ni bik ah a puang ta a ni.