Pu John Rotluangliana, FCS & CA Minister hovin vawiin khan a office ah National Food Security Act 2013 chungchang sawihona neih a ni a, he meeting ah hian Pu TT Zothansanga, Parliamentary Secretary; FCS & CA a Secretary Pu Hrangtawna, IRTS; FCS & CA Department Officer te leh NIC officer leh staff te an tel a ni.

Minister chuan Food Security Act hi Mizoramah chuan November thlaah tan tum a ni a, he Act in a huam tur thlanna ah hian a thlangtu te chuan rilru  zau tak pu a, political party sawi lovin harsa leh rethei zual tak takte thlang turin a chah a. Hun te a tawi tawh avangin FCS & CA a thawktute chuan chawlh pawh nei lovin an thawk dawn a, mipuiten tha taka lo tawiawm turin a ngen.

Food Security Act in a huam chin tur chu mi 7,06,296 chauh a ni dawn a. Kum 2011 Census base a tin a ni. Heta tang hian AAY chhungkaw awmsa 26,810 a huam ang a, heng chhungkua te hi mihring 128,114 an ni a. An ni hian thla khatah Kg 35 in 1Kg @ Rs. 3/- zelin an dawng ang. Hei bakah hian mi 578,182 thlanchhuah ten thla khatah mi pakhatin 5Kg in 1Kg @ Rs. 3 zel an dawng ve bawk ang. Tichuan, Food Security in a huam tur chu thingtlangah chuan mi 81.88%, a ni ang a, khawpuiah chuan mi 48.60% a ni ang.