Vawiin khan Champhai Venglai Community Hall-ah Kuthnathawktute Ni ropui taka hman a ni.
Champhai DC Pu Lalthangpuia Sailo kaihhruai Kut hnathawktute Ni hmanna-ah hian Parliamentary Secretary Pu KS Thanga chuan Mizoram Sorkar Flagship Programme NLUP avangin Mizoram a eizawnna kawnga rahbi tleu tawh chhungkaw tam tak khaichhuah mek an nih thu tarlangin, vawiin Kuthnathawktute Ni pual hian Zoram pum huap kuthnathawk tha khua leh chhungkua bakah District huapa titha ber thlan chhuahte hnenah lawmman pek an ni, a ti a. Champhai District huapa mimal kuthnathawk tha thlanchhuahte 1. B. Lalhruaia s/o Thanglinga Vaphai WRC 11 , 2. Tlanglawma s/o Dokunga (L) Hliappui Hill cattle, 3. Khamsialthanga s/o Phunthanga Melbuk Hill cattle te puangin, lawmman a hlan nghal bawk. Lawmman pakhatna hi Rs 75,000, pahnihna Rs 50,000 leh pathumna Rs 30,000 niin lawmpuina thuziak a keng tel a ni. Champhai District chhunga Hliappui khua chuan Mizoram puma khaw titha lawmman a dawng bawk.
Pu KS Thanga chuan NLUP Phase I dawngtute hnenah hamthatna pek fel khat tawh niin, Phase II pawh kalpui mek a nih bakah Phase III ah chhungkaw 45000 tan buaipui leh mek a nih thu a tarlang a, NLUP hmalakna kawnga chhawmdawl ngai chhungkuate tanpuina tur Exit Protocol atan sorkar laipuiin Cheng Vaibelchhe 1000 chuang ruahmanna a siam thu a sawi bawk.
Mizoram sorkar in NLUP hamthatna dawngtu a chhawmdawlna hi mipui hnenah a thlawna sum sem a nih loh thu sawiin, Pu KS Thanga chuan chhungkaw tam tak eizawnna tur hnabul tan sakna atan ruahmanna fel tak hnuaiah fimkhur takin tanpuina pek a ni a, kum 2 lek chhung pawhin chhungkaw tam takin eizawnna nghet neih phahin vawiin-ah mihlawhtlingte chawimawina hun hman a ni zawk, a ti a. NLUP nihphung leh kalpui a nih danah sorkar laipui chu a lungawi a, kalpui chhunzawm zel a tum bakah Flagship programme hi a hlawhtlin zual theih nan khawvel ram zau zawk atang pawhin kawng a inhawng mek a ni a ti bawk.
Kuthnathawktute Ni hmanna-ah hian AMFU Hqrs. atangin Pu C.Lalhlawhliana leh Hnamchhantu Pawl Hqrs. atangin Pu C.Lalthafamkima ten thu an sawi a. He hun hmanna-ah hian kuthnathawktu leh Champhai District-a sorkar Department hotute an kal tha hle a ni.
