Vawiin chawhma dar 11:00 khan Saikuti Hall, Lunglei-ah hmun dang ang bawkin Kut Hnathawktute Ni hman a ni a. He hun ah hian Minister Pu Zodintluanga chu khuallian ah hman niin Minister Pu PC Lalthanliana, Parliamentary Secretary Pu S. Laldingliana leh HPC Vice Chairman Pu Joseph Lalhimpuia te chu khual zahawm an ni thung.

Khuallian chuan Mizoram a mipui tam ber tlangram lo neia a eizawng thin, an eizawnna hlawk silote chhanchhuah nan Mizoram Sorkar in NLUP chu Flagship programme a tana bul a tan a nih thu a sawi a. He programme Kuthnathawktute thleng phak aia hmalakna tha zawk hi thildang a awm bik chuang lo a ni a ti. A hlawhtlin theih nan beneficiary te leh Line department te chu inpawh tlang taka in rawn thin turin a chah a. Line department mithiamte pawh beneficiary te hmalakna te enpui, a finchhuah thin turin a chah bawk a ni. Agriculture leh Horticulture kaihhnawih huan thlai, thei leh buhfai te a intodelh hmasak hi ram hmasawnna rahbi hmasa anih vangin sawrkar in a ngai pawimawh a ni a ti. Kut hnathawktute chu hmasawnna chabi kawltu te an nih avangin sawrkar-in an puala ni bik hi ruahman a nih thu a sawi a ni.

Khual zahawm Minister Pu PC Lalthanliana pawhin thusawiin economic independent chu tunlai khawvela thil pawimawh ber a ni a ti a.NLUP kaltlangin kan Chief Minister kaihhruaina hnuaiah Kut hnathawktu ten economic independent kan sual mek a,a hlawhtlinna tur chuan taimak leh tumruhna a pawimawh ber ang a ti a ni.

Parliamentary Secretary Pu S. Laldingliana pawhin Kut hnathawka eizawnna chu eizawnna ropui leh zahawm ber a ni a ti a. Kristian nun nen pawh inmil thlap eizawnna a ni a. Amaherawh chu awmze nei a, taimak chhuahin thawhrimna chuan hlawkna a siam thin a ni a ti. Agriculture, Industries leh Horticulture a mithiam bikte tam tak rawn tur an awm tawh a, hengte hi kuthnathawka eizawng ten rawnna chang an hriat a ngai a ni a ti a. Thusawitu dang Pu Joseph Lalhimpuia,Vice Chairman chuan khawvel finna leh hmasawnna te chu kut hnathawktute taimakna rah leh thlan tuifar atanga lo intan vek a nih thu a sawi a. Sawrkarin kuthnathawktute chungah beiseina sang tak a neih thu sawiin NLUP hlawhtlin nan tanpuina dawngtu zawng zawng te taima taka hmala chho zel turin a chah a ni.

Vawiin “Kut Hnathawktute Ni’ puala inkhawm hi Lunglei Bawrhsap Pu V. Sapchhunga IAS in a kai hruai a. He hun ah hian Lunglei District chhunga beneficiary ti tha mi pathum - pakhatna J. Lalnuntluanga , Salem, Lunglei Destop Publishing trade thlangtu, Pahnihna C.Lalpianthanga Hnahthial, WRC-I trade thlangtu leh pathumna Pc Robuanga, Sekhum, Serthlum trade thlangtu te chuan lawmman khuallian hnen atangin an dawng a ni.