Vawiin khan Scientific Advisory Committee (SAC), Krishi Vigyan Kendra (KVK), Champhai District chu an Chairman Pu Lalthansiama, Director of Agriculture (R&E) kaihruaiin Champhai I&PR Conference Hall-ah kumin chhunga KVK hmalakna te thlirhovin leh, kum 2016-2017 chhung atan Annual Action leh hmalakna tur chhawpchhuahte sawiin an thukhawm.

Chairman Pu Lalthansiama chuan Champhai District-a KVK hmalakna chu farmer-ten an tangkai pui hle nia a hriat thu tarlangin, Nodal Department mai bakah NGO-te pawh KVK nena inkungkaihna tha tak nei zel turin a sawm nghal a. KVK hnuaia Scientist-te chu an field theuhvah an thiam thu tarlangin Chairman chuan Farmer-te leh Home Science lamah pawh zirtirna pek chu KVK din chhan a nih angin, mamawhna awm phawt chuan training pe tura Scientist-te chu sawm theih reng an nih thu a sawi bawk.

Vawiin thutkhawmah hian Pi Lalrinawmi Renthlei, Senior Scientist & Head, KVK, Champhai District chuan District chhunga kum 2015-2016 chhunga KVK hmalakna leh Office dinhmun tlangpui a sawi a. KVK hi Indian Council of Agricultural Research (ICAR) hnuaia zirna centre pawimawh tak a nih thu leh, hmun danga technology research hrang hrang an kalpui hlawhtlin tawhte chu a nih ang ang Mizorama hman tura chawlut mai lovin, ram leilung leh sik leh sa nen a inmil em tih leh a hlawk thei ang bera chung thiamna thar te chu farmer-ten an hman tangkai theih dan tur enfiah te chu an hnathawh pui ber a nih thu a tarlang a. Enfiah hnua thlai chi emaw, chin dang kalhmang emaw thil dang dang hlawk leh tha ber te chu loneitute leh kuthnathawktute hnenah hlanchhawng a zirtirna pek a thin a ni a. Hemi kawngah hian Department hrang hrang nen thawhhona tha tak neih a nih thin thu Pi Lalrinawmi Renthlei hian a sawi a ni.

Champhai District-ah hian KVK hmalakna pui deuh chu thuang nga – Soil Science, Horticulture, Plant Protection, Agronomy leh Animal Science-ah te a then theih a. Heng subject hrang hrangah hian kum 205-2016 chhunga hnathawhte chipchiar zawkin a changtu theuh Scientist-ten chipchiar zawka hrilhfiahna vawiin hunah hianan neih bakah kum 2016-2017 atan hmachhawpte an tarlang a. Zawhna leh chhanna hun hlawkthlak tak hman a ni bawk.

Vawiin meeting-ah hian KVK Khawzawl thawktute bakah Pi Lalnunpuii, Deputy Director, Agriculture leh District-a Nodal Department hrang hrang hotute leh AMFU hruaitute an tel bawk ni.