Press Information Bureau (PIB) bultumin Sawrkar Laipuiin thingtlang hmasawnna tur leh mirethei te dawm kanna tur atana ruahmanna a siam chi hrang hrang mipuite a hrilhhriatna, Public Information Campaign (PIC) nihnihna chu vawiin khan tluang taka neih chhunzawm a ni a, Main venue Khawlailung ah Hrangturzo bialtu MLA, Mizoram Women Commission Chairperson ni bawk Pi Vanlalawmpuii Chawngthu chuan he hun hi khuallian niin a hmanpui a, Pi Teresy Vanlalhruaii, Project Director, DRDA, Serchhip chu Khualzahawmah hman a ni.

Khuallian chuan mipui kalkhawm hmaah thu sawiin Central Sawrkar leh Mizoram Sawrkar hmalakna avanga Sawrkar Laipuiin mipui te hamthatna tur a ruahman te inhrilhfiahna hun remchang tak hman a ni hi a lawmawm hle a ni a ti a, India ram Prime Minister meuh pawhin a thusawina a a sawichhuah khawpa Khawlailung khua hmingtha taka a awm chu bialtu MLA anihna ang pawhin thinlung taka a lawm thu leh mipui tanrualna leh thuawihna vang liau liau ani tih a hriat telna chuan a lawmna a belhchhah thu a sawi. Public Information Campaign buatsaihtu PIB team te thawhrimna fakin khuallian chuan Village Council member te thahnemngaihna leh taimakna rah an seng chho mek a ni a ti a, Khawlailung khua chuan mi hmelhriat an hlawh tawh avangin Model Village ni tura tan an lakna a an hlawhchham leh si chuan an mualpho hle dawn a ni a ti a, mipuite chu hmingthatna an lo hlawh tawh sa nemnghet tura an pawimawhna hrechiang turin a chah a ni. Khawtlang thatna tur leh hmasawnna tura Sawrkar hmalakna te tha taka lo thlawp a tawiawm tha tur a chahin khawtlanga hmasawnna a awm dawn chuan mipuite pawhinhuam ve a ngai a, kan ram emaw, huan emaw tlemte hleh thlak a lo ngai anih pawhin khawtlang dahpawimawh hmasa chunga rilru seng thin turin a ngen bawk a ni.

Khualzahawm Pi Teresy Vanlalhruaii, MCS, Khawlailung SAGY Charge Officer ni bawk pawhin thu sawiin khaw enkawltu leh neitu anihna ang pawha hma an sawnna ah lawmawm a tih thu a tarlang a, Model Village puan anih atang khan nasa takin hma an sawn tawh a, model village ni tura mipuite tih tur leh mawhphurhna pawh an hriat bel hle tawh thu sawiin kut silfai dan dik atanga bul tanin tunah hi chuan hmuh theihin mihring nunphungah pawh hmasawnna a awm a ni a ti a, hmasawnna tur tam tak an la neih thu sawi telin tan nasa taka an lak chhunzawm zel dawn thu leh hlawhchham an tum loh thu a sawi a ni.

Vawiin PIC nihnihna inkhawm hi Pu Biakchungnunga, Programme Executive, AIR in kaihruaiin Pu Mangjangam Touthang, Chairman, Core-Committee, PIC in inlawmna thu leh PIC nihphung sawifiahna hun a hmang a; Song & Drama Division, I&B Ministry ten Mizo Hnam Lam chi hrang hrang an en tir a ni.

PIC pual inkhawm neih zawh veleh hian khuallian hian Khawlailung Bazar Shed-a Horticulture Department leh DAVP ten Exhibition an buatsaih chu a tlawh a ni.

Chawhnu lamah Session hnih buatsaih niin Sawrkar Laipuiin thingtlang hmasawnna tura ruahmanna a siam chi hrang hrangte inhrilhfiahna hun leh sawihona hun mipuite nen hman a ni a, Session khatna hi Pu C. Lalrochhuanga, Serchhip District MJA Member-in kaihruaiin Social Welfare Department Official te leh Education Department Official ten sawrkar Laipui ruahmanna thar chi hrang hrang zinga an Department hmalakna chanchin sawifiah in zirtirna hun an hmang a. Session hnihna hi Pu C. Ramengmawia, General Secretary, MJA, Serchhip District-in kaihruai ve thungin Mizoram State Tobacco Control Society leh ICT Department official ten an hmalakna chungchang mipuite hrilhhriatna leh hrilhfiahna hun an hmang thung a ni.

Vawiinah vek hian North Mualcheng ah Public Information Campaign hi neih niin Health & Family Welfare Department in Free Health Camp an buatsaih bawk a ni. Public Information Campaign hi naktuk thleng hian neih tur a ni a, naktukah Serchhip District Bawrhsap Dr. Lalrozama, IAS chu khuallian a ni ang.