Vawiin khan UD&PA Department hmalakna na in Champhai Town Sanitation Task Force (CTSTF) chuan an Chairman Pu Vanlalngaihsaka IAS , Champhai Bawrhsap ni bawk kaihhruaina hnuaiah lui hnar,  tui leh kawr kam tihfai chungchangah awareness campaign neih a ni.

Campaign hi Champhai Tuipui hnar awmna hmun khankawnah Champhai Sp Pu BK Yadav IPS chuan a vai liam a,  Champhai  chhehvel zotlang, New Champhai leh Zote ah te Campaign hi neih a ni a.  Heng hmunah te hian CTSTF Chairman Pu Vanlalngaihsaka chuan faina leh thianghlimna pawimawh zia chu uar taka sawiin inchhung leh khawlai chauh ni loin,  Kan khawchhung luikawrte a fai a, kan tui tlan te a thianghlim a ngai a ni a ti a. Chhungtin leh mimal tin te bawlhhlawh paih kawngah kan fimkhur a ngai a, kan chenna in leh a vel fai mahsela, kan bawlhhlawh paihin kan thenawm te leh vantlang tana hnawksak a siam chuan kan la fai tawk lo tihna a ni a ti bawk. kan tui tlan ber chu a thianghlim a pawimawh hle a hnam leh khawtlang ang zawnga hrisel tur chuan kan tui tlan hi kan uluk a ngaia,  chumi tur chuan chhungtin in mawhphurna kan nei a, bawlhlawh paih bakah zun leh ek chungchangah kan chet thianghlim a pawimawh thu a sawi a.  Khawtlang mipuite leh khawtlang hruaitute chu hemi kawnga theihtawp chhuahpui turin a sawm a ni.

Hemi bakah hian Pu Lalrammawia,  SE, PHE Champhai chuan thu sawi bawkin khaw changkang leh hrisel tehna chu thianghlimna a ni a ti a. Thianghlimna kawnga pawimawh tak pakhat chu kan tui tlan a nih thu a tarlang a,  PHE Department chuan an tui lak chu sawngbawlin engemaw chen ti thianghlim mahse lui tui chu za a za natna hrik laka ven a harsat thu a tarlang a,  tui tlan a thianghlim loh chuan natna hrik chi hrang hrang cancer leh tui thianghlimlo kaihhnawih natna hrikte lakah kan him loh tur thu a sawi bawk a ni. Hemi avang hian mitin leh chhungtin in mawhphurna kan neih chu bawlhlawh paihna tur dik taka paih a, lui hnar leh tuikhur hnar te uluk taka enkawla then thianghlim paih a pawimawh thu a sawi bawk a ni. Pu Lalrammawia chuan Tuipui hnar chuan Champhai khawpui chhung a hel kual vek avangin Bawlhhlawh paihna tur hmun ni lo, luikawr kama kan paihte hi tuihawkin luikawrah len lutin Champhai tuitlan Tuipui luiah a luan luh vek thu a tarlang a. Champhai mipuite'n Tui thianghlim kan in theihna turin bawlhhlawh paih kawnga mipuite fimkhur zual a, bawlhhlawh paihna tura siamah chauh paih a tul thu a tarlan bawk a ni.

He hunah hian Champhai tui tlan ber Tuipui Lui hnar leh a chhehvel a bawlhlawh paih te chu a hmunah enfiah nghal niin, felfai leh thianghlim zawka kalpui dan tur te pawh a rang lama ngaituah tum a ni.

He Campaign ah hian Champhai khawpui chhunga sawrkar pisa thawkte bakah Sub-Hqrs YMA thuthmun Branch 25 atangin mi thanem tak an tel a, inzirtirna hmun hrang hrangah te hian khawchhung mipuite an tel bawk a ni.