Vawiin khan Chanmari YMA Hall-ah Drug Abuse Prevention Awareness Programme hman a ni a, he hunah hian Home Minister Pu R. Lalzirliana chu khuallian a ni. He hun, ruihhlo laka fihlim tura inhrilhhriatna hi Federation of Indian NGOs for Drug Abuse Prevention (FINGODAP) in a buatsaih a ni.

Home Minister chuan ruihhlo hian khawi ramah pawh khawtlang nunphung ngawng buaiin hmasawnna kawng hrang hrang a tithuanawp a, ram rohlu thalaite zalenna leh hmasawnna tur tichhia in, ei leh bar zawnna kawng pawh a nghawng tel vek a ni, a ti a. Ruihhlo in kum upat leh naupan lam emaw, hmeichhia leh mipa emaw a thliar hrang lova, ruihhlo hmansual avangin kan state ah tunah chhungkaw tin deuh thaw in harsatna kan tawh phah ta a ni, a ti a. Social Welfare Department-in mithiam 32 ruaia damdawi hman sual zirchianna atanga Baseline Survey Report an siam chu khuallian chuan sawilangin, ruihhlo ti thin mi 2633 an kawmna zingah Middle School thleng chauh zir  41.4%, Higher Secondary zir chhuak 36.2% leh Graduate 10.4% an awm thu te leh, heng mi 2633 zinga 86.6% chu hnathawh neilo an nih thu a tarlang a, hei hian ruihhlo avangin mihring in a nih tur ang a ni phak lo thin tih a chiang hle a ni, a ti.

Ruihhlo hmansual avanga natna inkawi chhawn theih HIV/AIDS leh Hepatitis te pawh kan ramah a mikhual tawh loh hle thu MInister chuan sawiin, ruihhlo hmansual vanga heng natna darh zel tur venna hna thawkte leh a veite enkawl hna thawk thinte chu mipuiin theihtawpa thlawp turin a duh thu a sawi a. Mizoram Sorkar pawhin Social Welfare Department hnuaiah Mizoram Social Defence and Rehabilitation Board (MSD&RB) a din thu leh, a mamawhtu te chuan he board hi chhawr tangkai tura a duh thu a sawi. Ruihhlo hman sual hi ven theih a ni a, a hmang sual mekte pawh enkawl theih an ni tih hre reng chungin ruihhlo laka fihlim turin mitin kan tan tlan a ngai a ni, Minister chuan a ti a. FINGODAP-in damdawi hman sual laka invenna kawng zirtirna an buatsaih chu chhuanawm a ti bawk.

Vawiin programme hi Pu Lalthanchhunga Ralte, FINGODAP Mizoram Chapter Vice Chairman chuan kaihruaiin, Dr. Eric Zomawia hnen atangin ruihhlo in thluak a khawih danglam dan leh harsatna a thlen hrang hrangte a sawifiah a; Ex- substance abuser Pu Salim Zothanpuia hnen atangin thusawi ngaihthlak a ni bawk.

FINGODAP Mizoram Chapter hian school hrang hrang zirlaite hnenah awareness programme hi a lo buatsaih tawh thin a. Vawiin programme-ah hian Mount Carmel School zirlaite an kal a ni.