Vawiin chawhma dar 10:00 khan Champhai District Bawrhsap Pu Lalthangpuia Sailo, IAS kaihhruaina in DC Office-ah Media Certification & Monitoring Committee (MCMC) thutkhawm vawi hnihna neih a ni. Hetah hian 2014 General Election neih tur inbuatsaih na peng pakhat chanchinthar thehdarhna hrang hrang Print Media leh Electronics Media te kal tlanga Candidate te fakna leh sawiselna lo enfiah dan tur chungchang sawi ho a ni.
General election lo awm tur ah hian Candidate te chuan inthlana hmanral theih chin Rs. Nuaih 8 nomination an file hma ngei in Bank ah A/C hawngin an deposit tur a niin an senso te chu Bank Draft/Cheque hmanga tih zel tur a ni. Election Commission of India in kaihhruaina dan a siam zul zuiin MCMC hi Candidates te Media hrang hranga infakna leh in sawiselna etc,. lo endik tu tur chu an ni in chumi senso ilo chu Candidates te expenditure ah dah zel a ni ang. MCMC hi Assembly Constituency tina awm tur a tih a niin, District Election Officer hona hnuaiah he committee hi din a ni a, thu thar theh darhna peng hrang hrang Print media leh Electronic Media kaltlanga Candidates te thu leh hla puan zarna chi reng chu chhinchhiah in a enfiah vek dawn a, thu dawn te chu Returning Officer (RO) leh Election Expenditure Observer hnenah nitin thehluh tur a tih a ni.
Politics rawngkai hmanga infakna leh insawiselna chi reng reng chu MCMC phalna leh remtihna la hmasa lo chuan chhuah phal a ni lova, hetiang thuchhuah duh neite chuan MCMC hnenah Form Annexure 27 hmanga in dil tur a ni. Thu chhuah na man (rate) chu district Election Officer leh Local Publisher inbiak remna ang a hman a niin, thuchhuah man hi Candidates senso a ziak luh tur a ni. MCMC hriatpuina leh phalna lova thuchhuah siam a nih chuan Candidates te chu ‘U/S 127 A of the RP Act 1951’ dan lawhchhanin thla 6 chhung Lung In tan emaw Rs. 2000/- chawitir theih a ni.
Candidates te leh anmahni lo thlawptu te media hrang hrang leh thuchhuah/Press release etc,. hmanga in fakna leh in chirhtheh na enfiahna kawngah MCMC hian thuneihna a nei sang in pawisa chawi leh Lung In tan theihna thleng a awm avangin hemi kawngah hian mitin te lo fimkhur lawk turin committee chuan mipui te a ngen a ni.
