Mizo thalaiten infiamna lama hma an sawn zel theihna tura ruahman (a) Stadium Puitling, Zotlang, Champhai, Mizoram Project Cost Rs.2238.69 lakhs leh (b) Stadium Puitling, Serkawn, Lunglei Project Cost Rs.2418.08 lakhs te chu Ministry of Urban Development, Govt of India chuan 4th September, 2013 khan sanction order a chhuah.
UD&PA Minister Pu Zodintluanga chuan thalaite hi ngaihsak loh an nih fo avangin thalaite hmakhaw ngaih hi a tul tih hriain Mizoram sorkar chuan thalaite khawvel thar kan siam ang tih leh district hrang hrangah sports stadium kan din ang a tih thin chu a takin a lang zel a. Chumi bawhzuina atan chuan heng sports stadium pahnih te hi ruahman a ni ta a ni. Heng project pahnih te hi National Building and Construction Company (NBCC) in a thawk dawn a. Zotlang, Champhai Sports Stadium hi thla 24 chhunga zawh hman tura ruahman a ni a; Serkawn, Lunglei Sports Stadium hi thla 30 chhunga zawh hman tura ruahman a ni. Heng ruahmanna bakah hian tunah hian Serchhip-ah Stadium puitling sak hna thawh mek bawk a ni.
UD&PA Minister chuan heng project pahnih te hi sanction an nih theihna chhan chu kan Chief Minister-in nasa taka min tuipui avang leh thahnemngai taka hma min lakpuina leh UD&PA Department a thawktute thawhrimna leh inpekna vang liau liau a nih thu a sawi. Officer te chu Delhi khawpuiah vawi tam tak zinin heng project te hi an umzui a, vawiinah a hlawhtlinna hmawr kan hmu tan hi a lawmawm hle a ni a ti.
Pu Zodintluanga chuan Mizo thalaite hian infiamna lamah hma an sawn nasa hle mai a, sorkar pawhin a theihna kawng awm apiangah thalaite tualchaina turin ruahmanna a siam zel a, world class sports infrastructure hmun hrang hrangah kan din chho mek zel a, heng avang te pawh hian world class player nakin lawkah kan neih thuai kan beisei a ni, a ti bawk.
