Vawiin chawhma dar 11:30 khan Champhai I & PR Conference Hall-ah Champhai DC Pu.Sangdingliana IAS, Chairman Champhai District Anti-Tobacco Squad hovin Mizoram Anti Tobacco Day hawnna hun hman a ni.

Hawnna inkhawm ah hian Pu Sangdingliana chuan Mizoram chu zuk leh hmuam hmangtu tam lamah Mizoram chu khawvela a sang ber a ni a, Tobacco khawpui tia hriat hial kan ni a, he kan dnhmun hi thlak a tul hle a. Hei vang hian Mizoram sorkar chuan May ni 31-a World No Tobacco Day hman thin bakah, Anti-Tobacco Day hi hman turin a ti a. Kumin hi a vawikhatna niin kum dangah pawh hman chhunzawm zel tur a ni, a ti. Champhai DC chuan vaihhlovin mihringa natna a thlen theih chi hrang hrang tarlangin, meizial bikah a khu hip atang pawhin natna hi kai theih a ni a, hei vang hian puipunna hmuna meizuk khap hi a tul zual bik a ni, tiin a sawi.

Pu Lalthamawia Bawlchim Secretary pawhin Champhai District Anti-tobacco squad te hmalak tawhna leh hmachhawp neih mekte a tarlang ve bawk. Mizoram hi zuk leh hmuam ti nasa ber state kan ni a, Khaini pawh hmuam nasa ber ram kan ni bawk (67.2%). Nakkum maiah hian Global Adult Tobacco Survey (GATS) neih leh tum a ni a. Mizoram Anti Tobacco Squad hmalaknain zuk leh hmuam bansan kawngah Mizoram mipuiten hma kan sawn ngei a tul thu a tarlang bawk.

Zuk leh hmuam kan tih nasat avang hian Mizoram hi Cancer chi hrang hrang avanga thi tamna state kan la ni mek zel hi a zahthlak hle a. Cancer vanga thihna a tlem theihna turin zoram mipui zawng zawngte tangrual turin a sawm bawk. Zuk leh hmuam that loh zia leh midangte tan pawha pawi thei a nih avangin mi pangai zingah chuan puipuina leh khawlai vel a meizu an tlem tawh thu sawiin Pu.Thamawia chuan Bazar hmuna vei vak leh chawhmeh zuar te leh sa sat zingah pawh mi pangai meizu man tur an vang tawh hle niin report a pe bawk.

Mizoram Anti Tobacco Day pual hian zing karah Bazarpuiah squad drive neih a ni a. Hawnna hun hman zawhah Office hrang hrang leh School remchangah te drive hi neih chhun zawm leh a ni. Mipui khawsakna hmun (public places) thenkhatah Signage tar a hnatlang neih nghal a ni bawk.

Anti Tobacco Squad, Champhaite hian inrinni zing leh bazaar ni apiangin Bazarpuiah Squad drive neih thin a ni a. Office leh School remchang hrang hrangah te squad drive hi neih thin a ni bawk. Meizial zawrhna dawr hrang hrangah leh School ah te signage hi tar tir an ni tawh bawk a ni.