2844/2023-2024

Champhai the 24th November, 2023 - November ni 7, 2023-a Mizoram Legislative Assembly Inthlanpui, 2023 buatsaiha Champhai District chhunga Assembly bial pathuma vote tlate chhiar tura ruat, Counting Supervisor-te leh Counting Assistant-te tan vawiin khan DC Conference Hall, Keifangtlang-ah training vawi khatna buatsaih a ni.

Champhai DC & DEO Pu James Lalrinchhana chuan vote chhiar chu inthlan kalpuinaa a hmawr bawkna leh inthlan hlawhtlinna lan chhuahna a nih angin Counting a duty tur official-te pawh uluk taka tlanchhuah an nih thu sawiin, an mawhphurna tha taka an hlen chhuah ngei theihnan training ah uluk taka inzir turin a chah a. MLA inthlannaa role pawimawh tak chelh theih chu sawrkar official tana thil lawmawm leh service chhunga chhinchhiah tlak anih thu sawiin, rilru zangkhai leh phur taka thawk turin a sawm a ni.

Vawiin training program hi Champhai Election Officer Pu Benjamin Zalawma Ralte in a kaihruai a. Pu M.Misael, Deputy DEO, Champhai District chuan Counting Supervisor leh Counting Assistant te mawhphurna hrang hrang (duties & responsibilities) te a zirtir a, Pu Lalrinawma Khiangte, SDO (S) leh State Level Master Trainer ni bawk chuan Vote chhiar ni a form hman turte a sawifiah a, Pu Moses Lalfakawma Tlau, SDC leh Dr Vanlalnunpuii Ralte, SDC te chuan EVM-a vote tla chhiar dan inzirtirna practical training an pe a ni.

Champhai District-a Assembly Constituency pathuma vote tlate chhiar tur hian Counting Supervisor leh Counting Assistant 29 theuh ruat an ni a. Ruahman lawk dan chuan, MLA Inthlanpui 2023-a Champhai District chhunga Assembly Constituency pathuma vote tlate hi December ni 3, 2023 (Pathianni) zing dar 8:00 a?angin DC Office, Keifangtlanga Counting Hall pathumah chhiar a ni dawn a. Bial tin tan counting hall hran theuh ruahman niin, counting hall tinah hian vote tlate chhiarna tur dawhkan 8 theuh a awm dawn a. Polling station hrang hranga vote tlate chu polling station number indawt dan zelin a tahtawla chhiar tura ruahman a ni a. Zing dar 8:00 ah Postal Ballot-a vote tlate chhiar tan tur niin, dar 8:30 atangin EVM-a vote tlate chhiar tan a ni dawn a, vote chhiar hi Round 4 ah zawhfel tum a ni.

Counting Supervisor leh Counting Assistant te tan hian November ni 30-ah Training buatsaih leh a ni dawn a. Vote chhiar a duty tur te hi Vote chhiar ni ah hian zing dar 5:00 ah DC Office Keifangtlang ah in report tura hriattir an ni a. Zing dar 5:00 ah hian an duty na tur Computer hmangin thliar fel (randomize) a ni dawn a ni.