2843/2023-2024

Aizawl, the 24th November 2023: Vawiin khan MPCB Conference Hall, MINECO, Khatla-ah ‘Northeast Yatra for Lifestyle (LiFE) in Mizoram’ hawnna neih a ni.

He hunah hian Er. C. Lalduhawma, Member Secretary, Mizoram Pollution Control Board chuan Environment humhim leh venhim kawnga hma la nasa turin mipui rilru kaihthawh a, a zau thei ang bera tidarh turin kal khawmte a fuih a. Single Use Plastic khap chungchangah pawh a bul tantu ni tur leh midangte zirtirna pe turin kalkhawmte hnenah ngenna a siam nghal bawk.

Hun kaihruaitu Er. Benjamin Lalnunsanga Colney, Programme Officer, Mizoram EIACP Hub – Mizoram Pollution Control Board chuan Mission LiFE (Lifestyle for Environment) chungchang leh Northeast Yatra for Lifestyle Mizorama kalpui a nih dan turte sawifiahin Yatra programme-in a tum ber chu environment him leh tlo zawk kan neih theih nan mi tinte’n kan nunphung pangngai kalsana environment tana tha zawk nunphung thlang tura inzirtir a ni tih a sawi.

Ditrict hrang hranga Yatra kalpui dan tur power point presentation hmangin Pi C. Malsawmzuali, Scientist ‘B’-in hrilhfiahin Yatra Kick off Programmme hi district hrang hranga Yatra Team-te’n online Google Meet kal tlangin an lo chhim ve bawk a ni.

Northeast Yatra for Lifestyle (Life) hi Northeast state pariat (8)-ah November thla chhung hian neih tur a ni dawn a, Mizoram-ah chuan Mizoram EIACP Hub - MPCB hnuaia din Yatra Team-te’n District tinah Yatra hi an kalpui dawn a ni.

Northeast Yatra for Lifestyles (LiFE)-ah hian mipuite hnenah tam zawk leh zau zawkin ‘environment’ humhalh leh venhim pawimawhzia zirtirna pek a ni ang a, activities hrang hrang – Awareness campaign, house to house campaign, mass rally, cycling, lui tihfai hnatlang, hman khat daih sarang chhar fai hnatlangte leh online quiz-te he Yatra chhung hian neih a ni ang.