Thianghlim zawka mipuite hnenah sa zawrh a nih theih nana Champhai District AH & Vety Department leh Butcher Cooperative Society-in an hmalakna Modern Meat Shop chu vawiin khan Champhai Vengthlangah mipui dawr theihin hawn a ni. He Meat Shop hi RKVY atanga sum hmuh atangin District AH & Vety Department chuan a sakna tur hi a tum a, a sak hna leh enkawl hi Butcher Cooperative Society, Champhai chuan an tum a. Meat Shop sakna a tum bakah AH&Vety Department chuan Deep Freezer (quintal 4 dawng thei) chu Society hi a pe bawk.

Meat Shop hawngtu Champhai DVO Pu Lalchungnunga Pudaite chuan mipuiten thinghlim zawka sa leina tur an nei ta chu thil lawmawm tak a nih thu sawiin, meat shop hawn chu a bultanna chauh a la nih thu leh, a hlawhtlinna tak tak chu mipuiten an hlut thiam leh thiamloh ah a innghat a ni, a ti a. Mipuite pawhin rannung leh bawlhhlawh dangin a bawm lohna hmun ngei atanga sa lei chu a thlanawm zawk tih an hriat ngei a beisei thu a tarlang bawk. DVO chuan Champhai Butcher Cooperative Society member-ten sum ringawt um lova sa hrisel leh thianghlim zawrh an tum thin bakah, buk dik taka sa zawrh an ngaipawimawh chu lawmawm a tih thu a sawi bawk.

Champhai Meat Shop hi Pu Thavunga Building, DK Traffic Point bulah chhawng hnih asiama ni a. AH & Vety Department chuan Kanan Veng-ah thianghlim zawka sa sahna leh sawngbawlna tur hmun a buatsaih mek bawk a ni. Vawiin Meat Shop hawnna hun hi Pu K. Zamlova’n kaihruaiin, Champhai Vety Officer-te leh Butcher Society member-te an tel kim hle a ni.