Vawiin khan Mizoram Khadi and Village Industries Board, Kolasib District office building sak thar chu hawn a ni a, Pu K. Lianzuala, Ex-MLA leh Chairman, Mizoram KVI Board chuan building thar hi a hawng a ni.

Mizoram KVI Board Chairman Pu K. Lianzuala chuan KVI hi Mizote ten kan tangkaipui chho mek a, lehkhathiam leh kutthemthiam mi tam tak tan training leh loan lak tur te buaipui sakin mi tam takin eizawnna ngelnget an nei mek a ni, a ti a. KVI hmalakna hi loan kaltlanga hma a laksak anih thusawiin loan rulh kim hi a latu tena an tihtur leh an mawhphurna a ni tih hi kan hriat nawm fo a ngai a ni, a ti bawk. Mi thenkhatin KVI leh Corporation-te an ngaihbelh thin thu sawifiahin Pu K Lianzuala chuan KVI Board chu amaha inrelbawl (autonomous) a ding a ni a, a tum chu hlawkna neih nilovin lehkhathiam leh eizawnna nei lo te tan training leh thil danga pui a, eizawnna ngelnget siamna kawnga theih tawpa puih a ni, a ti.

Pu K. Lianzuala chuan MKVI Board  hmalakna hrang hrang te sawiin Mizoram KVI Board chuan District 5 ah office an hawn tawh thu leh tuna Kolasib Office hawn tak hi District office building anmahni puala an neih hmasak ber a ni a ti a. Office thar hian nasa zawkin mipui rawngbawl hna thawk sela tiin a duh thu a sawi a, a thawktu te pawh mite harsatna sutkianna kawngah leh mite tanpuina kawnga nasa lehzual zawka thawk turin a chah a ni.

Thusawitu dang Kolasib Addl. DC Pu R. Lalremsanga chuan KVI chu mi harsa leh mi rethei zawk te tana eizawnna kawng siamsak tu nia a hriat thusawiin Office thar chu District tih changtlunna zel a ni, a ti.

Office building thar hawnna inkhawm hi Pu Kaisangzuala, Chief Executive Officer (CEO) chuan kaihruaiin Pu P.C. Laltlansanga, Member, Mizoram KVI Board chuan inlawmna thu a sawi a, Pu Rodinsanga, Asst. Project Engineer, Mizoram KVI Board in Technical Report tarlangin building chanchin  leh ruangam te a sawi a. Pu F. Lalrinenga, Executive Officer (Marketing) Mizoram KVI Board chuan lawmthu sawiin hun a khar a ni.

Mizoram KVI Board, Kolasib office thar hi cheng nuai 15.28 senga sak niin building chawng hnih (a chung rangva) a sak a ni a, a ban leh first floor hi RCC a sak niin a chawng hnihna chu tile bang a ni a. He building sak nan hian sawrkar atangin fund an dawng lova, an mahni pawisa tlingkhawm 'sale proceeds' atanga an sak a ni.