Vawiin chawhnu dar 2:00 khan Sericulture Department, Serchhip District chuan SAGY hnuaia an hmalakna pakhat atan Chhiahtlangah Silk pangang keusa an sem.

Vawiina Silk Pangang keusa (Chowki-Worms) semna hun hi Pu V. Zothansanga, District Sericulture Officer hova neih a ni a, Pu V. Zothansanga, DSO chuan thusawiin, hetiang hun hi la hman chhoh zel tur a ni a,  pangang an tet laia mithiamte enkawlsa sem chhuah hi uar chhoh zel tum a ni a ti. Pangang te hi an tet laia enkawlna tha tak an dawn a, mithiamten uluk taka an vil chuan a  thar hlawk bik thin a, tuna pangang keusa an sem chhuah pawh hi pangang vulhtute hian chawlhkar hnih vel bak an enkawl a ngai tawh dawn lova, chumi hnuah chuan cocoon an siam thei mai tawh dawn a, loneitute tan a tha hle a ni a ti bawk.

SAGY hnuaia hmalakna in Sericulture Department hian Chhiahtlang Model Village atan pangang vulhna tur In Rs. 3,00,000/- sengin an sa zo tawh a, vawiina pangang keusa sem chhuahna hun pawh hi he an in sakah hian hman niin, chhungkaw 14 te hnenah pangang keusa hi sem chhuah a ni a, District Sericulture Office-a thawktute leh Chhiahtlang Village Council hruaituten he hun hi an hmanpui a ni.