Vawiin chawhma dar 10:00 khan DIET Auditorium (District Resource Centre), Champhai Zotlang-ah Myanmar official te tana thla khat chhung awh tur Spoken English zirna Champhai DC Pu Vijay Bidhuri, IAS in a hawng a, he hunah hian Myanmar official 40 in saptawng hi an zir dawn a ni.

Hawnna thu sawia chibai bukin Champhai DC chuan he programme hi India sorkar leh Myanmar sorkar te inbiakna an bawhzuina kal zel a nih thu a sawi a, nikum 18th October, 2011 a Falam District a Myanmar leh India sorkar aiawhte inbiakhona a an thurel bawhzuina a hlawhtling thei chu lawmthu sawiin Falam District a inbiakna an neihah Myanmar official ten tha taka an lo dawnsawnna-ah lawmthu a sawi bawk. Champhai DC chuan thlakhat chhung Champhaia saptawng an zir laiin harsatna an neih chuan inthlahrung lova sawi zel tur leh an zirna thutchilhtu tur DIET Principal Pu Lalthianghlima pawh hrilh hreh lo turin DC chuan Myanmar official te chu a chah a, venhimna lamah pawh hmun ralmuang tak a ni a, venhimna tha tak pek an nih reng tur thu a hrilh a, Field visit pawh siam sak an nih tur thu leh Champhai-a an awm chhunga thlamuang taka awm turin a chah a ni.

Champhai District Superintendent of Police Pu C. Lalthanmawia pawhin thu sawiin inbiak pawhna atana tawng inhriat tawnna a pawimawh thu sawiin saptawng zir mai bakah ram in thenawm inhriatpawhna, inthianna leh sual hnathawh (crime) do kawngah inpuihtawnna atan he programme hian rah tha tak a chhuah ngei a beiseiawm a ni, a ti a. DC te nen theihtawp an chhuah tur thu a sawi a, Champhaia an awm chhunga Discipline vawng tha tur leh Principal thu awih turin a chah bawk.

Myanmar officer P.I. Thein Zau (Police Inspector) pawhin thu sawiin hetianga Champhaia an kal thei chu lawmawm a tih thu sawiin “Kan in chhuang hle a, Myanmar lama kan hotute pawhin he programme hi kan inunauna atan a tha in an ring a ni” tiin lawmthu a sawi.

He programme hawnna inkhawm kaihhruaitu Pu K. Lalrintluanga, DEO, Champhai chuan Myanmar mite chu khawchhung a hmun hrang hrang pawimawh, Office hrang hrang, Bazar leh Infiamna hmunte fanpui an nih tur thu sawiin an duh phawt chuan Pathianni ah pawh Biak Inah te kal ve turin a sawm a ni.

Myanmar official te hi Saptawng leh Mizotawn engmah thiam lo an ni a, a bul atanga zirtir an ni dawn a, Kawl tawng thiam, Champhaia-a School hrang hranga thawk zirtirtu 8 te chu Tawnglettu atan hman an ni ang a, nitin an inkal chhawk ang a, DIET a thawkten Saptawng hi an zirtir thin ang.

Vawiin a hawnna inkhawmah hian Pu Malsawmliana, Teacher, Govt. Middle School, Zotlang in tawng a let a ni.