Vawiin chawhma dar 11:00 khan Champhai I & PR Auditorium ah Fisheries Department hnuaia NLUP Sangha khawi thlangtu chhungkua 85 hnenah tanpuina pawisa 2nd Phase (1st Installment) chu Pu T.T.Zothansanga, MLA Champhai North bialtu chuan a sem.

Champhai District Fisheries Department in an buatsaih Training on Fish Culture Under NLUP 2nd Phase, 2013' ah hian Khuallian Pu T.T.Zothansanga, MLA chuan thu sawiin Champhai DFDO Pu B.D.Tyagi ten sangha enkawl tute tana tangkai tak Training manual for Fisheries Schemes under NLUP’ tih lehkha zotawnga chhiar theih mai tur an lo chhawpchhuak chu lawmawm a tih thu sawiin sangha khawi lama harsatna neite pawhin an rawn mai theih tura Champhai ah ngei Fisheries Department office a awm chu lawmawm a tih thu a sawi.

Lei rem rap thei tawh lo te tana Inkhai chhuah nana hetiang hun tha NLUP hmanga sawrkarin a siam chu lawmawm a tih thu sawiin Pu T.T. Zothansanga chuan sawrkarin a tihtur chinte chu a rawn ti zel anga, chu chu NLUP dawngtute pawhin kan ram leh hnam tan a ni tih hre renga hnathawk a lo bawhzui ve a ngai a ni tiin sum dawn zat in ang vek siin hmanchhuah dan leh tan lak dan a inang lo palh ang tih a hlauhawm tih sawiin tun atanga kum 2/3 hnuah chuan kan hman tangkai dan leh a hlawhtlin dan a lo lang dawn a ni tiin Champhai phei chu mithiam ten kan leilung a tha e an lo tih thin angin kan buh thar chhuah leh sangha khawi te pawh a tui bika sawi anih thin ang ngeiin tuna NLUP hmanga kan sangha khawi te pawh khaw danga hralh chhuah theih ngei tura hlawhtling tura tan la theuh turin kalkhawmte chu a ngen a ni, a ti a. “Mi hlawhtling te chu umzui zel kan turn a, chutiang mite pui tur chuan sawrkar a inkau reng a ni. Amaherawhchu he pawisa hi a nihna tur ni lovah kan hmang ang tih a hlauhawm a, chuvang chuan a nihna ang ngei in’ I hmang tangkai ang u” Khuallian chuan a ti bawk.

Khual Zahawm Pu Zoengsanga, Addl.D.C Champhai District pawhin thu sawiin Pathian leh sawrkar zara malsawmna kan dawnah lawmthu sawi a ngai a, vawiin a Rs. 50000/- an sem hi kuthnathawktu tarn tak nitina eizawng tan chuan thawhchhuah hautak tak a ni a, A dawngtute an vannei hie a ni tiin mahni duhthlanna ngeia sawrkarin eizawnna ngelnghet nei tura kawng a buatsaih sak enkawl puitling tur hian an mawhphurhna san zia hria a enkawl puitling ngei turin kalkhawmte fuih in sawrkar ti hmingtha tu ni tura thawk turin a ngen a ni.

Vawiin programme hi Pu B.D.Tyagi, DFDO, In a kaihruai a, Champhai District a hmalak dan hrang hrang te a sawi.

Vawiin a NLUP 2nd Phase (1st Instalment) sem ah hian mi 85 hnenah Rs.50000/- (Singnga) theuh sem a ni a. Champhai District ah hian NLUP sangha khawi thlangtu mi 192 an awm a, Ngopa leh Khawzawl-ah pek tawh niin Farkawn ah sem leh a ni ang.

Chawhnu lamah training session neih chhunzawm zel a ni anga, Naktuk ah Practical training Hmunhmeltha ah neih a ni ang.