Vawiin chawhnu dar 1:30 khan Serchhip Bawrhsap Pi Juhi Mukherjee, IAS kaihhruaina in Serchhip District chhunga Mizoram sawrkar Flagship Programme NLUP kalpui mek hian tlang ram lo neih (Jhuming) ban san kawng a nghawng a neih tawh dan zirchian (survey) dan tur ngaihtuah a ni a, NLUP Line Department hrang hrang te leh Serchhip Sub-Headquarters YMA hruaitute he meeting ah hian an tel a ni.

District Bawrhsap chuan NLUP thil tum zinga pawimawh ber pakhat chu tlang ram lo neih bansan anih avangin Sawrkar-in a ngaipawimawh em em a, NLUP hlawhtlinna tehfung pawimawh tak pakhat anih bawk avangin tunah pawh eng tiang chiahin nge hma kan sawn pui tawh tih hriat a duh a, ruahmanna tha tak a rawn siam a ni a ti a, YMA chu khawtin a awm leh khaw chhung dinhmun hrechiang tu ber an nih avangin dik tak leh felfai taka hna thawh anih theih nan thawhpuiah a sawm a, Sub-Headquarters YMA hruaitute pawhin an huam chhung Branch tin ah chuan theihtawp chhuahpui an inhuam thu an sawi ve bawk.

Serchhip District chhunga Assembly Constituency pathum (Serchhip, Tuikum, Hrangturzo) ah hian NLUP hnuaiah khaw 49 a awm a, an zing a khaw pali – Biate (Champhai District), Phulmawi, Tlungvel, Darlawng (Aizawl District vek) te hi Serchhip District pawn a awm an ni. Ruahman dan chuan khaw tin hi NLUP Line Department ten in zat theuhva insem in an chanpual khaw tinah theuh Tlang ram lo neih la bansan lo chhungkaw zat Survey hi an nei ang a, an kalna apiangah Village Council te leh YMA ten an lo puibawm thin dawn a ni.

Survey neih dan tur hi khaw tinah Chhungkaw awm zat, Tlangram lo neia eizawng zat (Leilet siam te a huam tel lo), Lo neia ei la zawng te lo zau zawng etc. te uluk taka chhinchhiah a ni ang a, an Survey report hi March ni 28, 2013 ral hma in DC Office ah an theh lut ang.