September Ni 23 atanga Ni 25 chhung khan Zokhawthar kaltlanga Burma ram atanga Vawkte lo lut te NLUP a sem tlak a ni em tih Mizoram Sorkar-in a enfiah a, heng vawk an enfiah te hian tunlai vawk natna PRRS an vei lo tih hmuhchhuah niin NLUP a vawk vulh thlangtute tan sem tura ruahman an ni.

Burma ram atanga vawk lolut te enfiah tur hian Mizoram Sorkar chuan Vety Department-a Ran natna enfiah thiam bik Dr. Esther Lalzoliani leh Dr C. Neihthangpuii te Aizawl atanga rawn tirin Champhai Vety Department te nen tang kawpin Vawk te hi enfiah a ni a, heng an vawk endik 495 te hi an thisen laksak vekin a mal te tein Laboratory-ah test hrang hrang an paltlang tir leh a, Computer leh PRRS Test-na khawl bik hmanga endik an nih hnuin Vawk thisen an test-ah hian PRRS hrik pakhatah mah an hmu chhuak lo a ni.

Burma ram atanga vawk lolut ah te hian PRRS an hmuhchhuah tak loh avangin Mizoram Sorkar leh Vety Department te chuan NLUP a Vawkvulh Trade thlangtute tan sem tlakah an ngai a, Tuna thleng tawh leh an test tawh sa vawk 495 te hi Champhai leh a chhehvela NLUP 2nd Installment atan naktuk hian Vety Deptt. chuan an sem chhuak nghal dawn a ni. Heng Vawk semna hun hmang tur leh vawk te en tur hian Animal Husbandary & Veterinary Minister C. Ngunlianchunga chuan naktuk Inrinni hian Champhai a kal nghal dawn a ni.

Mizoram Sorkar chuan NLUP a sem atan hian Tripura leh State dang atangin man to taka vawk lalutin an lo sem tawh a, mahse heng vawk an sem tawh te hi an thih nasat avang leh senso a tam avangin hmun dang atanga lakluhna hi a ngaihtuah reng a, Burma Vawk te'n PRRS an vei lo tih hmuhchhuah a nih takah chuan sum leh pai senso tlem zawkin Mizoram sik leh sa mil leh ngeih sa Vawk an sem thei tawh dawn a ni.