Vawin khan I&PR Auditorium CHANEM Building-ah Champhai North leh South A/C - a BLO te tan Special Summary Revision of E-Roll 2015 training buatsaih a ni.

He hun hi Pu Benjamin Lalzama SDO in a khaihruaiin, Pu Zoengsanga Addl DC chuan khuallian niin a hmanpui a. Khuallian chuan thusawiin Champhai chu ramri depa awm kan nih avangin kan ramdang mite nen inchiahpiah em em a, Roll felfai tak kan neih theihna turin kan fimkhur tur a ni tiin BLO kalkhawmte chu a chah a, Pu Zoengsanga chuan, Politician-te angin thahnem kan ngai ve ringawt tur a ni lo a, dik tak leh rinawm taka titute kan ni tur a ni a ti a, khua leh tui diktak te chauh roll-ah kan chuan tir tur a ni a, a nihna ang takin kan ziak ngam tur a ni. Roll felfai leh belhchian dawl kan neih theihna turin fimkhur tak leh theihtawp chhuah chhungin hna kan thawk tur a ni a ti bawk.

He hunah hian Pi C Lalnunmawii SDC leh Pu Zoremthara Rate BDO Champhai RD block-ten zirtirna pe in, Form chi hrang hrang hrilhfiahna leh fill-up dante zirtirna an pe a ni. Special Summary Revision 0f E-Roll 2015 ah hian India khua leh tui diktak Jan ni 1.2015 a kum 18 tlingte thunluh an ni ang.