Chief Minister hmalakna bawhzuia department tin ten hmasawnna tura ruahmanna thar an siam sawihona kal zelah, nimin khan Chief Minister Pu Lal Thanhawla chuan a office cabinet roomah a enkawl department PWD, P&E leh I&PR hotu ten hmasawnna tur ruahmanna thar an chhawpchhuah te a sawipui.

PWD in hmachhawp a chhawpchhuah thar zingah Lungleiah Architect leh supporting staff siam a rawt a, hei hi chhim lama project neihte awlsam zawka enkawl theihna tura tih a ni a.A.E/SDO leh JE post ruak engemawzah awm chu hnawh khah dan ngaihtuah nise an ti bawk a.Hemi bakah Land Acquisition Coordinator leh Assistant Architect post ruak te pawh hnawhkhah nise an ti a. Court case departmentin a neih te lo buaipui turin Law Graduate pakhat M/R basis a rawih nise tih leh Publicity Cell din nise an ti bawk a ni. Hengte bakah hian hna thawk tura contractor thlan tawhin midang hnena a hna an hralh thin hi tih tawp dan ngaihtuah nise tih leh sorkarin Road Fund, Road Fund Rules hman thuai leh thingtlang kawngpui te enkawlna tur sum ngaihtuah nise tihte sawiho a ni.

Power & Electricity department in hmasawnna tur ruahmanna a siamte an sawihonaah power supply mumal taka pek anih theih nan spare parts leh bungraw pawimawh zual neih lawk nan Stock Expense Fund siam nise tih an sawiho a. Departmentin mithiam alo rawih tawh, M/s ASCI, Hyderabad te rawtna anga Generation, Transmission, leh Distributionah department chu then nise tih chu sawiho a ni bawk a. Post ruak hnawhkhah chungchang leh quality control lam ngaihpawimawh a tul thu te an sawiho a ni.

Heng technical department pahnih Chief Minister in a sawipui zawhah Information & Public Relations Department ina hmachhawp a neihte an sawiho leh a.Department chuan tun hmaa a mamawhte hnena radio sem thin kha fund siama sem chhunzawm leh nise tih chu sawiho a ni a, Bharat leh Aizawl Darshan pawh chhunzawm leh nise tih leh Minister tinte hmalakna hi thlakhatah vawikhat tal media kaltlangin tlangzarha, pholan thin nise tihte an sawiho a ni.

Sawihonaah hian department hotute bakah Secretary te an tel vek bawk a ni.