Vawiin chawhma dar 11:30 khan Champhai Town Hall ah MLA General Election 2013 lo awm tura Polling Personnel te tan inhrilhfiahna hnuhnung ‘Final Briefing’ neih a ni.

Pu Zoengsanga Returning Officer kaihhruaiah hian mi chi hrang hrangte duty na tur hmun ruat chung changah hian induhsakna a awmloh thu a sawi a, thiante, chhunkhat laina te pawh duhsak an nilo tih a sawi a, khawl hmanga siam a nih avangin khawl in a rawn tihchhuah dan ang ang kha duty na hmun tura dahngheh mai a nih thu a sawi a, kan duty na hmunah thil hriatchian loh leh hriat duh kan neih chuan mahni duhthua ngaihdan lo siam mai lovin, District Election rawn hriattir zel turin a chah bawk a ni.

He hunah hian Champhai District Election Officer Pu Lalthangpuia Sailo, IAS Champhai Bawrhsap ni bawk pawhin thu sawiin, inthlana duty tura ruatte hi mi pawimawh an ni tih hre thar leh turin a chah a, inthlan muanawm leh felfai kan neih theihna tura mi pawimawh tak, mawhphurhna nasa tak nei an ni tih hrethar leh turin a fuih a, tihsual neih palh a hlauhawm zia sawiin, in suspend thlenga hma lak theih a nih avangin kan hna kan uluk a ngai a ni ati a, tawngtai thlahthlamlo tura fuihin, Pathian hrereng chunga hna thawk turin a fuih bawk a ni. DC chuan, Observer ten thil an uluk zia sawi bawkin, an duh dan anga thil tihpui hram hram turin a ngen bawk a ni.

Pu Benjamin Lalzama A.R.O pawhin thu sawi bawkin, tun inthlan ah hian EVM tluka pawimawh an ni tih hrereng turin a chah a, an hna an thawh laiin mahni an inringtawk tlat tur a ni a, engemaw a lo thleng palh a nih pawhin buai mai lo tur leh khawtlang leh Polling agent te nena sawikhawm zel turin a chah bawk a ni. Pu Benjamin Lalzama bakah hian Pi Rochuangkimi Khenglawt MCS, SDC Champhai pawhin thu a sawi bawk a ni.

MLA General Election 2013 ah hian Champhai District ah Polling Agent 664 awmin naktuk zing dar 7 atangin an duty na hmun tur panin an chhuak dawn a, naktuk zing dar 7:00 hian team 7 ten an duty na hmun tur an pan dawn a, Dar 9:00 ah team dang an chhuah leh dawn bakah Chawlhni zing dar 9 ah team dang an chhuak leh dawn bawk a, Polling Party zawng zawngte hi khaw thim hma ngeia an duty na hmun tur theuh thleng tura tih an ni bawk.

Champhai Town Hall ah hun hman zawh a nih hnu hian Champhai District Election Office ah inthlan chungchanga an mamawh tur hrang hrangte Polling Parties te hian an an la nghal a ni