Vawiin khan Champhai District huam chhunga nau piang & mitthi zat chhinchhiahtu Registrars of Births & Deaths mi 100 vel tan Economics and Statistics Department chuan training a buatsaih. Vawiin training, Champhai Vengsang YMA Hall-a neihah hian Pu Lalrikhuma Sailo, Joint Director, Economics & Statistics Department chuan zirtirna pe in, nausen lo piang hlimin sorkara chanvo a neih hmasak ber chu a hming leh pian ni chhinchhiah hi a ni a, chumi a mawhphurtute chu vawiina Registrar kalkhawmte hi kan ni, a ti a.

Pu Lalrikhuma Sailo chuan ‘Registration of Births & Deaths Act 1969’-in a phut angin India rama nau piang (thisa a piang telin) leh mitthi zawng zawng a bo a bang awm lovin chhinchhiah vek tur a ni’ tih a tarlang a. Birth Certificate hi khua leh tui nihna (Citizenship) chhinchhiahna ni lo mahse, Voter’s ID dilna atan thuneituten thil tula an chhiar si avangin Registrar kalkhawmte chu fimkhur hle turin a chah a. Mi, an pianni, thla leh kum register tawhte reng reng (delayed registration huamin) chu an date of birth tihdanglam theih an ni tawh lo tih hi kan chhinchhiah tlat a pawimawh a. Chhan chi hrang hrang leh tulna bik thil engvang pawh ni se, kum tihdanglam hi a rem tawh lo a ni, a ti.

Registration of Births & Deaths Act hnuaiah hian pian/thih atanga ni 21 chhungin awlsam takin engmah chawi ngai lovin Damdawi In-a piang chu Damdawi In-a Registrar hnenah, in lama piang chu Local Registrar hnenah in register theih a. Ni 21 a ral hnu, ni 30 a ral hma-in District Research Officer (Economics & Statistics) hnenah Rs.2/- chawiin in register theih leh a. Ni 30 a ral hnu, kum khat a ral hma chuan Director, Economics & Statistics hnenah Rs 5/- chawiin in register theih bawk. Kum khat a ral hnu chuan District 1st Class Judicial Magistrate phalna lak hmasak a ngai a ni. Chuvangin ni 21 chhunga awlsam taka tih theih anih laia in register ngei chu District mipuite tan a sam ber a ni.

Registration of Births & Deaths Act, 1969 hi Mizoramah chuan kum 1985 atanga hman tan chauh anih avangin hemi hun hmalama piang/thi te chu Delayed Registration tih a ngai a. Delayed Registration-ah chuan 1st Class Judicial Magistrate phalna a ngai a, a tihdan kalhmang chu DRO Office-ah zawhfiah theih a ni.