Nimin a Lunglei a zin Principal Secretary, Health Pu Arun Goyal chuan tukin zing khan Civil Hospital, Lunglei a tlawh a, Dr.Malsawma Pachuau, Nodal Officer, IDSP, Directorate of health Services-in Aizawl atangin a rawn tawiawm bawk a ni.

Lunglei Civil Hospital CMO Dr.VLMS Dawngliana bakah Medical Superintendent, doctor leh nurse ten Pu Arun Goyal chu lo hmuakin OPD, Operation Theater, Dept. of Pathology, Department of Microbiology, Department of Biochemistry, Blood Bank leh Hospital Ward hrang hrangte an tlawh chhuak vek a; Principal Secretary chuan Ward leh Department tina an hnathawn dan Register-a chhinchhiah te a en bawk a ni. Hemi hnu hian Civil Hospital Superintendent Dr.Lalsanga kaihhruaina hnuaiah Doctor-te nen meeting an nei a, Lunglei Civil Hospital-a thawk Doctor leh Head of Department te chuan an harsatna hrang hrang, doctor leh staff indaihloh dan te, hmanrua an mamawh dan leh an neih loh te Principal Secretary hnenah an thlen a ni.

Pu Arun Goyal chuan Civil Hospital, Lunglei a rawn tlawh thei chu lawmawm a tih thu sawiin harsatna hrang hrang karah hospital-a thawktu zawng zawng ten theihtawp an chhuah zel avangin a fak a, mipuite tana an rawngbawlnaah tan la sauh sauh turin a fuih bawk. Sorkarin mipuite hriselna a ngaih pawimawh em avangin Hospital-te chu thawmthat a, tun aia tichangtlun turin hmalak a tum a ni, a ti a. Lunglei Civil Hospital-in an harsatna leh mamawh hrang hrang a hnena an thlen chu theih ang tawka bawhzui a tum thu sawiin, hun lo kal zelah an harsatna leh maawhte chu amah hnenah email hmanga thleng thin turin a hrilh a ni.

Civil Hospital, Lunglei-ah hian khum 100 awmin Ward hrang hrang 9 a awm a ni.

Attachment

  • Loading attachment...