Chief Minister Pu Lal Thanhawla chuan nizan (16.12.2014 - 6:45 PM) khan Hotel Regency ah Maulana Azad Centre for Research on North East (MACRNE) a hawng. He Centre hi Mizoram University Campus a din tur a ni.

Chief Minister chuan India hmarchhak bial hi hmun pawimawh taka awm, rampum tan pawha thil rohlu siam theihna tam tak awmna a ni a ti a. Hei hi Sorkar Laipui pawhin hre tawhin tunah hian a rohlu neihte dapchhuah dan kawng a zawng mek tawh a ni a ti a. Hmarchhak bial danglamna hi academic lam atang pawha thlirin zirchian tlak a awm ani a ti.

Chief Minister chuan Maulana Azad Centre hian helai biala hnam hrang hrangte tawng, khawtlang nun, hnamziarang leh chutiang a kaihhnawih te zirchiang tura Maulana Azad Kalam Institute for Asian Studies (MAKAIAS) leh Mizoram University (MZU) ten hma an la hi a lawmawm hle a ni a ti a. Thil dang chi tam tak zirchianna hmun ni bawk se a duhawm hle ang Pu Hawla chuan at ti a; hei hian hmarchhak bial mai nilo, ram pum tan thil hlawk tak a ni thei a ni a ti. Beiseina sang tak nen Centre hlawhtlinna chu duhsakna a hlan a ni.

Hawnna inkhawm lianlo tak, urhsun taka neih hi Prof.J.K.Patnaik, MZU, and Coordinator, MACRNE in a kaihruai a. Prof.R.Lalthantluanga, Vice Chancellor, MZU, Dr.Sreeradha Datta, Director, (MAKAIAS), Kolkata leh Prof.O.P.Mishra, Jadavpur University ten thusawina hun an hmang bawk a ni.

MAKAIAS hi autonomous body niin, Union Ministry Human Resource Development hnuaia department of Culture lehWest Bengalsorkar ina a din, department of culture in sum a tum a ni a, Kolkata hi an hmunpui ber a ni. Kum zabi 19 na atanga Asia khawmuala chengte khawtlang nun, political, sorkar inrelbawl dan te leh economics lama a than chhoh dan te bakah India nen inkungkaihna a neih dan te zirchianna hmun a ni a. Central sorkar in North East Programme a neihah he Institute hian research project sawmhnih chuang kum 2000 atang khan alo kalpui tawh a, hmarchhak biala tribal te nunphung a zirchiang chho mek a ni. Heng bakah hian sorkar do zawnga rammut (insurgency problems) te, drugs leh silai tawlhruk leh thil dang tam tak an zir bawk a ni.