‘Sipaite hi midangte entawntlak in ni’ Chief Minister Pu Lal Thanhawla chuan a ti. He thu hi vawiin Vijay Diwas hmanna nipahfawm a Ex-Servicemen Reunion 2014 neihna 39 Assam Rifles Cinema Hall-a a hmanpuina a a sawi a ni. Chief Minister chuan sipaite leh sipai bang tawhte chu kawng hrang hrang hriselna lamah te, zuk leh hmuam leh ei leh in lamahte leh mahni inthununna lamahte mi rinawm leh dik, mi entawntlak vek in tiin, khawtlang hruaitu atan te in tha hle a ni a ti.

Chief Minister chuan Mizoram buai hma a India sipaiah Mizoten kan thawh hlawk hle thin tih sawiin, hnam rinawm leh huaisen, ram tihmingthatu an ni thin a ni a ti a. Rambuai hnuah nasa takin sipaia tang kan tlahniam a. Sipaia tan hi kawng tam takah a that bik avangin Mizo thalaite hi a tam thei ang ber sipaia an luh theihna turin sorkar ang pawhin kawng an dap reng thin a ni a ti a. Sipaia tang duh latu Recruiting Team te pawh Mizoram kilkhawr zawka sipai tang duh dap chhuak thin tura thurawn a pek thin thute a sawi a. Heng hmalaknate avang hian Mizo thalai thahnem tak tunhnaiah sipaiah an lut a ni a ti. Chhuan lokal leh zel tur tana sipai officer ni thei tur leh khua leh tui tha chherchhuah anih theihna atan Sainik School pawh Chhingchhip ah kalpui mek a ni a ti a. Pu Hawla chuan sipai nih hrim hrim hi a ropui a ni tiin, an inpekna leh tawrhna avangin keinin thlamuang takin kan awm theih phah a ni a ti.

Col (Rtd) John Zama chuan kalkhawmte lawmna thu a sawiah sipai bangte tan Pu Lal Thanhawla hian hamthatna a ngaihtuahsak hle thin a ni a ti a. Sainik School tur leh zel a din sak tur hi a lawmawm tak meuh a ni a ti a. A hmalakna avanga sipai lakna runpui Recruitment Rally te vawi tam tak Mizoramah ngei neih anih avanga Mizo thalai tam tak sipaiah an luh theih phah a ni a ti.

Sainik Welfare & Resettlement Director Sgt Lt. Commander Lalnuntluanga chuan sipai bang te leh an fate tana hmathatna tur engemawzah ah hmalak anih thu a sawi a, kum 2014-15 chhungin Mizo thalai Army ah 160 leh Navy ah 1 an luh thu a sawi bawk a ni.

Vijay Diwas hi India leh Pakistan Indona 1971, Bangladesh War tia hriat thin bawk, India in hnehna ropui tak a chan hriatrengna lawmna ni a ni a. He hnehna ah hian Mukti Bahini ten India sipai te nasa taka tanpuiin, Pakistan General A.K.Niazi leh a sipai 93,000 zet te chu India sipai General Aurora hnenah an inpe (surrender) a ni.

Reunion-ah hian 39 A.R Commandant Col Alok Sethi pawhin thu a sawi a. Parliamentary Secretary Lt.Col(Rtd) Z.S.Zuala leh Capt (Rtd) Hmingdailova te an tel bawk a ni.